Իրանի գերագույն առաջնորդ այաթոլլա Ալի Խամենեին հայտարարել է, որ Թեհրանը չի բանակցի նրանց հետ, ովքեր, իրենց շահերից ելնելով, պարտադրում են դրանք: Նրա խոսքով՝ «ագրեսիվ կառավարությունների» համառությունն ուղղված չէ խնդիրների լուծմանը, հաղորդում է «Կոմերսանտը»։
Ավելի վաղ ԱՄՆ նախագահ Դոնալդ Թրամփը նամակ էր հղել Իրանի իշխանություններին՝ միջուկային զենքի շուրջ բանակցությունների առաջարկով։
«Որոշ ագրեսիվ կառավարությունների համառությունը բանակցություններում ոչ թե խնդիրների լուծմանն է ուղղված, այլ գերակայությանը։ Նրանք ցանկանում են իրենց պահանջները պարտադրել բանակցային սեղանի մյուս կողմում նստածին»,- ասել է Ալի Խամենեին (մեջբերում է ISNA-ն):
Իրանի գերագույն առաջնորդի խոսքով՝ բանակցություններում կքննարկվեն երկրի պաշտպանունակությանը և միջազգային կարողություններին վերաբերող հարցեր։ Նա կարծում է, որ Թեհրանից կպահանջեն «ինչ-որ բան չանել, չհանդիպել որոշակի մարդկանց հետ»։
Մարտի 7-ին Դոնալդ Թրամփը հայտարարեց, որ նամակ է ուղարկել Իրանի իշխանություններին՝ առաջարկելով բանակցություններ վարել Թեհրանի միջուկային զենքի հետ կապված մտահոգությունների պատճառով։ Նա հավելել էր, որ Իրանի հետ հարաբերություններում շուտով «հետաքրքիր ժամանակներ» են գալու։ Մինչ այս ԱՄՆ նախագահը խոսել էր նաեւ Թեհրանի հետ նոր միջուկային գործարք կնքելու հնարավորության մասին։
