ԱՄՆ նախագահ Դոնալդ Թրամփը կիրակի Fox News-ի հետ հարցազրույցում մեկնաբանել է Կիևին զենքի մատակարարումը դադարեցնելու իր որոշումը։ Նրա խոսքով՝ Ուկրաինան «կարող է չգոյատևել» նույնիսկ Վաշինգտոնի ռազմական օգնության դեպքում։
Բացի այդ, ամերիկացի ղեկավարը ևս մեկ անգամ հանդիմանել է Ուկրաինայի նախագահ Վոլոդիմիր Զելենսկուն, որը, ըստ նրա, «երախտապարտ չէ ԱՄՆ օգնության» համար։ Այնուամենայնիվ, Սպիտակ տան ղեկավարն ակնկալում է, որ Զելենսկին կվերադառնա Վաշինգտոն, և Ուկրաինայում հազվագյուտ հողային մետաղների վերաբերյալ գործարքը կստորագրվի։
Ինչպես ավելի վաղ հայտնել էր ամերիկյան NBC հեռուստաալիքը, վկայակոչելով անանուն զրուցակիցներին, Դոնալդ Թրամփը «մասնավոր կերպով հասկացրել է իր օգնականներին», որ Ուկրաինային ռազմական օգնությունը վերսկսելու համար ցանկանում է տեսնել Զելենսկու «վերաբերմունքի փոփոխությունը» Ռուսաստանի հետ բանակցային գործընթացի նկատմամբ։
Ըստ NBC-ի զրուցակիցների՝ խոսքը Կիևից զիջումների մասին է, օկուպացված ուկրաինական տարածքները Ռուսաստանին հանձնելու և Ուկրաինայում ընտրությունների հնարավոր անցկացման համատեքստում։
