Խաղաղության ճանապարհին բազմաթիվ խոչընդոտներ կան. Բայրամով

«Հայաստանն Ադրբեջանի նկատմամբ դեռևս պահպանում է տարածքային նկրտումներ, երկրում նկատվում են ռևանշիստական տրամադրություններ, այս ամենը շարունակում է մնալ խոչընդոտ՝ Բաքվի և Երևանի միջև կայուն խաղաղության ճանապարհին». հայտարարել է Ադրբեջանի արտգործնախարար Ջեյհուն Բայրամովը՝ Աստանայում Ղազախստանի իր պաշտոնակցի հետ ասուլիսին։

Բայրամովը շնորհակալություն է հայտնել Ղազախստանին՝ հայ-ադրբեջանական հարաբերությունների կարգավորման բանակցությունների համար անցած տարվա մայիսին հարթակ տրամադրելու համար:

«Միջպետական հարաբերությունների կարգավորման և Ադրբեջանի ու Հայաստանի միջև խաղաղության պայմանագրի ստորագրման գործընթացում բավական մեծ ճանապարհ ենք անցել։ Չնայած դրան, տևական խաղաղության ճանապարհին բազմաթիվ խոչընդոտներ կան։ Հիմնական խոչընդոտներն են՝ Ադրբեջանի նկատմամբ Հայաստանի Սահմանադրության մեջ պահպանվող տարածքային պահանջները, այդ երկրի սրընթաց ռազմականացումը, աճող ռևանշիստական տրամադրությունները»,- ասել է Բայրամովը։