«Հանուն Հանրապետության» կուսակցության նախագահ Արման Բաբաջանյանը գրել է.
«Բաքվում պահվող հայ գերիների հարցը բացահայտում է ոչ միայն Ադրբեջանի ցեղասպանական քաղաքականությունը, այլև Ռուսաստանի անգործությունը, պայմանագրերի նկատմամբ իր բացարձակ անպատասխանատվությունը և Հայաստանի շահերը պաշտպանելու ցանկության բացակայությունը։
Նոյեմբերի 9-ի հայտարարությամբ բոլոր գերիները պետք է անհապաղ ազատ արձակվեին։ Այս փաստաթղթի հեղինակը և երաշխավորը Պուտինն է, բայց պատերազմից չորս տարի անց հայերը դեռ Բաքվի բանտերում են։ Սա նշանակում է միայն մեկ բան՝ կամ Ռուսաստանը չի կարողանում պարտադրել Ալիևին կատարել պայմանավորվածությունները, կամ պարզապես չի ուզում։
Մարտի 12-13-ին Եվրախորհրդարանը կրկին քննարկելու է այս հարցը։ Եվ հենց Արևմուտքի ճնշման արդյունքում այն մնում է միջազգային օրակարգում։
Արևմուտքը ԵՄ-ում, ԱՄՆ-ում, Ֆրանսիայում, միջազգային դատարաններում հետևողականորեն պաշտպանում է հայերի իրավունքները։ Արևմտյան կառույցներն են, որ Ադրբեջանի դեմ պատժամիջոցներ քննարկելու հարց են բարձրացնում, քաղաքական ճնշում են գործադրում Բաքվի վրա։
Նրանք, ովքեր Հայաստանում առավոտից երեկո հայհոյում են Արևմուտքին, այսօր հենց այդ Արևմուտքից են օգնություն խնդրում գերեվարված մեր հայրենակիցների հարցում։ Ինչո՞ւ չեն դիմում Մոսկվային։ Որովհետև գիտեն, որ Ռուսաստանը ոչ միայն անելիք չունի, այլև չի պատրաստվում միջամտել։
Այս իրողությունների պայմաններում պատրանքները պետք է ավարտվեն։ Հայաստանի իրական դաշնակիցները նրանք են, ովքեր առևտուր չեն անում հայերի ազատությամբ, ովքեր բարձրացնում են այս հարցը միջազգային ամենաբարձր հարթակներում։
Հայաստանի անվտանգությունը հնարավոր չէ կառուցել Ռուսաստանի հույսին մնալով։ Աշխարհաքաղաքական նոր իրականությունում ազգային շահերի պաշտպանությունը հնարավոր է միայն Արևմուտքի հետ ամուր և ռազմավարական համագործակցությամբ։
Հայ գերիների հարցն այլևս պարզապես հումանիտար խնդիր չէ։ Դա պետական ինքնիշխանության, քաղաքական կողմնորոշման և ազգային անվտանգության հարց է։ Ու ընտրությունը հստակ է՝ սպասել Պուտինի դատարկ խոստումներին, թե իրական անվտանգության հենարան ձևավորել այն ուժերի հետ, որոնք իսկապես պաշտպանել և պաշտպանելու են Հայաստանի և հայ ժողովրդի շահերը»։
