ՌԴ ԱԳՆ խոսնակ Մարիա Զախարովան հայտարարել է, որ ԱՄՆ-ն իրեն հեռու է պահում Եվրոպայի՝ Ուկրաինա խաղաղապահներ ուղարկելու ծրագրերից: «ԱՄՆ-ն հասկանում է, թե ինչ հետևանքներ կարող է ունենալ այդ քայլը»,- ասել է նա:
Նա նաև շեշտել է, որ Ռուսաստանը չի ընդունի Ուկրաինայում այլ երկրների զինված ուժերի տեղակայումը: Ըստ նրա, նման քայլը կնշանակի հակամարտության մեջ ներգրավվել, ինչին Մոսկվան կարձագանքի բոլոր հնարավոր միջոցներով:
«ԵՄ որոշ երկրների՝ Ուկրաինա խաղաղապահներ ուղարկելու ծրագրերը սադրիչ քայլեր են, որոնք ուղղված են Կիևի մոտ անառողջ պատրանքներ պահպանելուն: Նման ծրագրերի մասին նույնիսկ խոսելը մենք համարում ենք բացահայտ սադրանք, որը ոչ թե նպաստում է հակամարտության կարգավորմանը, այլ ուղղված է Կիևի ղեկավարության մոտ անառողջ և վնասակար պատրանքներ պահպանելուն»,- ասել է նա:
Զախարովան նաև նշել է, որ Եվրամիությունն աստիճանաբար կորցնում է իր սկզբնական էությունը: «ԵՄ-ն մեր աչքի առաջ տնտեսական միությունից վերածվում է ռազմական կառույցի»,- ընդգծել է նա:
Բացի այդ, ՌԴ ԱԳՆ խոսնակը խոսել է Ռուսաստանի և ԱՄՆ-ի միջև շփումների մասին՝ ասելով. «ՌԴ-ի և ԱՄՆ-ի միջև կապերը կարող են վերսկսվել արդեն այսօր: Ռուսաստանը պատրաստ է ԱՄՆ-ի հետ քննարկել Ջիդայում ԱՄՆ-ի և Ուկրաինայի միջև բանակցությունների արդյունքները»:
