Հայաստանի ԳԽ և Արցախի ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է.
Ադրբեջանը կարող է Ուկրաինային ոչ միայն մարդասիրական, այլեւ ռազմական օգնություն ցուցաբերել, բոլոր ատյաններում «պաշտպանել» նրա ինքնիշխանությունը եւ տարածքային ամբողջականությունը, բայց իրական քաղաքականության տրամաբանությամբ նրան ձեռնտու է, որ այդ պատերազմում հաղթի Ռուսաստանը: Ինչու՞: Որովհետեւ եթե հետխորհրդային տարածքում խախտվում է Ալմա-Աթայի հռչակագիրը, ապա դա նախադեպ է, որ Բաքուն կարող է օգտագործել Հայաստանի դեմ:
Ես Ռուսաստանի եւ ռուս ժողովրդի դեմ բացարձակապես ոչինչ չունեմ, միակ օտար լեզուն, որով հավելյալ գրականություն եմ կարդում՝ ռուսերենն է, այդ երկրում ապրող բարեկամներ, ընկերներ, ծանոթներ ունեմ, որոնց միայն լավն ու բարին եմ ցանկանում: Բայց ես հանուն Հայաստանի ցանկանում եմ, որ Ռուսաստանն Ուկրաինայում չհաղթի: Ցնորամտությու՞ն է: Գուցե: Որովհետեւ պատերազմի ելքն իմ ցանկությամբ չի՞ պայմանավորված: Իհարկե: Բայց ես կարող եմ եւ պետք է այնպես անեմ, որ Հայաստանում Ուկրաինայի դեմ Ռուսաստանի հնարավոր հաղթանակը չտոնվի: Որովհետեւ ռազմա-աշխարհաքաղաքական իմաստով դա Ադրբեջանի տոնը կլինի: Թեեւ, չեմ կասկածում, Կիեւի «կապիտուլյացիայի» համար ողբացողներից մեկը Բաքուն է լինելու:
