«Կա թյուր կարծիք, թե ԵԱՏՄ ստանդարտներն ավելի ցածր են, քան ԵՄ ստանդարտները, բայց դա բացարձակապես այդպես չէ»,- հայտարարել է էկոնոմիկայի նախարար Գևորգ Պապոյանը:
Նա նշել է, որ ԵԱՏՄ-ում դրված են շատ բարձր և բարդ ստանդարտներ, ինչը նորմալ և տրամաբանական է, և դա արվել է ԵԱՏՄ երկրների տնտեսությունների մրցունակությունն ապահովելու նպատակով: «Ուզում եմ ուրախությամբ նշել, որ մենք որոշակի պատմական փուլեր ենք անցել»,- ասել է նա:
Պապոյանի խոսքով, և ԵՄ, և ԵԱՏՄ շուկաները շատ շոշափելի են. «Եւ ԵԱՏՄ շուկան է իր ֆինանսական, տնտեսական, ֆիզիկական ծավալներով ՀՀ համար շատ մեծ ու կարևոր շուկա, և ԵՄ շուկան։ Ես այդտեղ տարբերություն չէի դնի»։
Պապոյանը կարևորել է նաև տնտեսության դիվերսիֆիկացիան. «Եթե որևէ ապրանք մենք արտահանում ենք միայն Ֆրանսիա, ես խնդիր եմ դնում այն արտահանել նաև ՌԴ, Չինաստան և Էմիրություններ։ Եթե որևէ ապրանք արտահանում ենք միայն ՌԴ, ես խնդիր եմ դնում արտահանել նաև Ֆրանսիա, Էմիրություններ և այլն»։
