ԱԺ նախագահ Ալեն Սիմոնյանը հայտարարել է, որ ծանոթ է Հայաստանի և Ադրբեջանի միջև խաղաղության համաձայնագրի տեքստին, և դրանում ՀՀ-ի համար որևէ վտանգավոր բան չկա: «Բոլոր կետերը երկկողմանի են: Եթե ասում ենք, որ վտանգավոր կետ կա, և եթե որևէ կետ մեկնաբանվի որպես վտանգավոր, այն հավասարապես վտանգավոր է նաև Ադրբեջանի համար»,- ասել է նա:
Հարցին, թե ինչո՞ւ չի հրապարակվում այդ տեքստը, Սիմոնյանը նշել է, որ դրա մի մասը հայտնի է. «Մենք գործ ունենք մի կողմի հետ, որին ամեն տեղ պատճառ է պետք՝ որևէ բան հայտարարելու և ինչ-որ ձևով խնդիրներ ստեղծելու համար: Երբ հասկանանք հրապարակման ժամանակն ու տրամաբանությունը, երբ պահը գա, բնականաբար, կհրապարակենք»:
Նա շեշտել է. «Վերջին տարիների ընթացքում կարողացել ենք այս իրավիճակում դառնալ օրակարգ ձևավորող և օրակարգին համահունչ կողմ, ինչը շատ դժվար էր մեր պարտությունից հետո, բայց մենք դա հաջողել ենք»:
