«Շատ լավ են արել, որովհետև բոլորի թիկնազորները պետք է ստուգեն»,– հայտարարել է ԱԺ ՔՊ խմբակցության պատգամավոր Խաչատուր Սուքիասյանը՝ լրագրողների հետ ճեպազրույցում անդրադառնալով օրերս իր թիկնազորին ստուգելուն։
Նա նշել է, թե թիկնազորը սոցիալական անհավասարության տպավորություն է ստեղծում. «Մենք ուզում ենք, որ ՀՀ-ն լինի բոլորի համար հավասար։ Հնարավոր է՝ ես, որպես պատգամավոր, որպես պետական մտածողություն ունեցող մարդ, մտածեմ, որ թիկնազորով քաղաքում և քաղաքից դուրս շրջելը այնքան էլ ընկալելի չէ տուրիստների ու քաղաքացիների համար։ Այդտեղ պետք է այլ մեխանիզմներ մտածվեն, նոր օրենք պետք է գրվի»,– ասել է նա։
Սուքիասյանի խոսքով՝ ինքը չգիտի, թե ինչ են փնտրել իրավապահները. «Զենքը պետք է օպերատիվ տվյալներով իմանան, նոր փնտրեն։ Եթե փնտրելու բան չկա, չեն փնտրում։ Դա էլ թող հասկանան, որ զենք փնտրելով չէ, այլ՝ զենքն իմանան՝ կա, թե ոչ»։
Նա նաև նշել է, թե թիկնազորին գետնին չեն տապալել, այլ հրավիրել են, պարզաբանումներ են ուզել։
