ՀՀ ԱԺ պատգամավորներ Ծովինար Վարդանյանն ու Արուսյակ Մանավազյանը փոփոխություններ են առաջարկել «Էներգետիկայի մասին» օրենքում:
Ծովինար Վարդանյանի խոսքով, 2018-ից սկսած՝ էլեկտրաէներգետիկական շուկան աստիճանաբար ազատականացվում է, ինչի արդյունքում սպառողները կարող են ընտրել տարբեր մատակարարներ՝ «Հայաստանի էլեկտրական ցանցեր» ՓԲԸ-ի փոխարեն: Թեև 22 մատակարար լիցենզիա է ստացել, շուկայում ակտիվ է միայն 6-ը, իսկ առաջատար երեքի առևտրի ծավալները զգալիորեն տարբերվում են:
Առաջարկվում է, որ փոքր հիդրոէլեկտրակայանները, արևային և հողմային կայանները առաջիկա երկու տարում կարողանան հրաժարվել էլեկտրաէներգիայի գնման երաշխիքից և մտնել մրցակցային շուկա՝ առանց այն վերականգնելու իրավունքի: Սա կընդլայնի մրցակցային շուկայում վաճառողների թիվն ու էլեկտրաէներգիայի ծավալները՝ խթանելով շուկայի զարգացումը:
Ծովինար Վարդանյանը հայտնել է, որ օրինագիծը մշակվել է տնտեսավարողների հետ քննարկումներից հետո:
Նախագիծը դրական եզրակացություն է ստացել:
