Բուժօգնության շրջանակներում ուղղաթիռով 42 անգամ բուժառուներ են տեղափոխվել. նախարար

ՀՀ առողջապահության նախարար Անահիտ Ավանեսյանը ներկայացրել է 2024 թվականի կառավարության ծրագրի (2021-2026 թթ.) կատարման ընթացքն ու արդյունքները: Նա նշել է, որ նախարարությունը շարունակել է աշխատանքը երեք հիմնական ուղղություններով՝ բարձրացնելով բժշկական ծառայությունների հասանելիությունը, բարելավելով դրանց որակը և նվազեցնելով մանկական մահացության ցուցանիշը: Բարելավվել են նաև հիվանդությունների վաղ հայտնաբերումն ու կանխարգելումը:

2024-ին չարորակ նորագոյացություններով հիվանդների համար իրականացվել է 66,252 բժշկական ծառայություն (վիրահատական, քիմիաթերապևտիկ, ճառագայթային), ինչը 2023-ի 50,000-ի համեմատ աճ է: Կոլոռեկտալ քաղցկեղի վաղ հայտնաբերման սքրինինգով կատարվել է 5187 հետազոտություն (2023-ին՝ 2149): Կրծքագեղձի քաղցկեղի կանխարգելման համար արվել է 4462 անվճար մամոգրաֆիկ հետազոտություն (2023-ին՝ 9681): Սրտանոթային հիվանդությունների բուժման համար կատարվել է 15,305 վիրահատություն (2023-ին՝ 13,146), այդ թվում՝ 2682 անհետաձգելի սրտային վիրահատություն (2023-ին՝ 2530): Գլխուղեղի կաթվածների բուժման համար մատուցվել է 789 ծառայություն (2023-ին՝ 770), իսկ աորտայի անևրիզմայի վիրահատությունների համար՝ 84 (2023-ին՝ 67): Օրգանների փոխպատվաստման 83 ծառայություն է իրականացվել, այդ թվում՝ 22 երիկամի, 4 լյարդի և 57 ոսկրածուծի/ցողունային բջիջների փոխպատվաստում (2023-ին՝ 68):

Անվճար բժշկական օգնության շրջանակում ուղղաթիռով 42 անգամ տեղափոխվել են բուժառուներ (2023-ին՝ 65): Նախարարը նշել է, որ 2024-ին նվազել է ծնելիությունը, ինչը համարել է մտահոգիչ խնդիր: