ՀՀ պաշտպանության նախարար Սուրեն Պապիկյանը ԱԺ հանձնաժողովում հայտարարել է, որ, չնայած հրադադարի ռեժիմի խախտման մասին ադրբեջանական կողմի տեղեկություններին, 2024 թվականի ընթացքում հայ-ադրբեջանական սահմանին պահպանվել է հարաբերական կայուն օպերատիվ իրադրություն։
«ՀՀ զինված ուժերում արմատական համակարգային բարեփոխումների իրականացման հիմնական ուղենիշները սահմանելու նպատակով 2024 թվականին մշակվել, հավանության է արժանացել և հրապարակվել է բանակի կերպափոխման հայեցակարգը։ Բացի այդ, մշակվել է հայեցակարգից բխող գործողությունների ծրագիրը»,- նշել է նա՝ ներկայացնելով կառավարության ծրագրի կատարողականի պաշտպանական ոլորտին վերաբերող մասը։
Նա անդրադարձել է նաև սպառազինության և ռազմական տեխնիկայի արդիականացման ծրագրերին՝ նշելով, որ նոր նմուշների ձեռքբերման նպատակով մատակարարման պայմանագրեր են կնքվել մի շարք ռեզիդենտ և ոչ ռեզիդենտ ընկերությունների հետ։ Շարունակվել են նաև ինժեներական-ամրաշինական աշխատանքները, իրականացվել են մշտական տեղակայման վայրերի կառուցման և վերանորոգման աշխատանքներ։
Հանձնաժողովի նիստը շարունակվում է փակ ձևաչափով, քանի որ քննարկվելու են պետական գաղտնիք հանդիսացող տեղեկություններ։
