Ռուսաստանը Հայաստանին բարեկամ երկիր է համարում և մտադիր է հետագայում զարգացնել երկկողմ հարաբերությունները: Այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը:
Ըստ ՏԱՍՍ-ի, նա մեկնաբանել է ԶԼՄ-ների հաղորդագրությունները, որոնցում նշվում է, որ ՀՀ վարչապետ Նիկոլ Փաշինյանն իր բոլոր գերատեսչություններին հանձնարարել է «վերականգնել կապերը» ռուս գործընկերների հետ:
«Իրականում Ռուսաստանի և Հայաստանի միջև հարաբերությունները չեն ընդհատվել և չեն կարող ընդհատվել: Հայաստանը մեզ բարեկամ երկիր է: Այն ինքնիշխան պետություն է, սակայն մեզ շատ բան է միավորում՝ երկկողմ, պատմական և մշակութային առումով, ինչպես նաև ԵԱՏՄ-ի նման կարևոր ինտեգրացիոն միավորմանը համատեղ մասնակցության առումով: Մենք ավելի քան գոհ ենք մեր երկկողմ հարաբերությունների հեռանկարների նկատմամբ հայկական կողմի այդ փոխադարձ վերաբերմունքից և պատրաստ ենք դրանք ամեն կերպ զարգացնել», – նշել է Պեսկովը:
