ՀՀ ԱԱԾ տնօրեն Արմեն Աբազյանն անդրադարձել է անհայտ կորածների և գերեվարվածների հարցով Հայաստանի ու Ադրբեջանի հանձնաժողովների հանդիպմանը։ Նրա խոսքով՝ ամեն ինչ արվում է, որպեսզի կրկին հանդիպում կայանա, և անհայտ կորածների ու գերեվարվածների ծնողների կողմից բարձրացված հարցերին ամբողջական պատասխաններ տրվեն։
Այլ մանրամասներ Աբազյանը չի հայտնել՝ նշելով, որ հարցը որոշակի գաղտնիություն է պարունակում. «Ես չեմ ցանկանում շտապել և տրամադրությունների որևէ փոփոխություն արձանագրել, բայց վստահ եղեք՝ հայկական կողմն ամեն ինչ անելու է, որպեսզի այդ ուղղությամբ անպայման հաջողություն ունենանք։ Հուսով եմ»։
Գերիների վերադարձի վերաբերյալ նա նշել է. «Շոշափելի արդյունքների մասին այս պահին չեմ ցանկանում որևէ այլ բան բարձրաձայնել։ Դուք ցանկանում եք պատասխան ստանալ ցավոտ ու բարդ հարցի վերաբերյալ, սակայն այդ պատասխանը կարող է ձեզ չգոհացնել։ Դա չի նշանակում, որ մենք հաջողություններ չունենք, այլ այն, որ կոնկրետ այսօր դեռևս հաջողություն չունենք»։
