ՀՀ ֆինանսների նախարար Վահե Հովհաննիսյանը ներկայացրել է 2024 թվականի կառավարության ծրագրի կատարողականը: Նա հայտնել է, որ 2025 թվականի պետական բյուջեում առաջին անգամ նախատեսվել է կապիտալ ծախսերի չկատարված պայմանագրային պարտավորությունները հաջորդ տարի տեղափոխելու մեխանիզմ, ինչը կարևոր քայլ է բյուջետային կառավարման համար: Բացի այդ, սահմանվել են եռամյա մակրոտնտեսական և հարկաբյուջետային շրջանակներ՝ որպես հիմք 2026-ին եռամյա բյուջե ընդունելու համար:
2024-ին բյուջեի եկամուտները կատարվել են 95.8%-ով, որից հարկերն ու տուրքերը՝ 92.7%-ով, իսկ ծախսերը՝ 93.9%-ով: «Ծախսերն աճել են 16%-ով, իսկ եկամուտները՝ 9.3%-ով՝ համեմատած 2023-ի հետ»,- նշել է նախարարը:
Պետական պարտքը 2024-ի վերջին կազմել է 5 տրիլիոն դրամ (մոտ 12.8 մլրդ դոլար)՝ 6.2%-ով ավելանալով նախորդ տարվա համեմատ: Սակայն պարտք/ՀՆԱ հարաբերակցությունը մնացել է 48.3%՝ 0.1%-ով ցածր 2023-ի ցուցանիշից: Հարկեր/ՀՆԱ ցուցանիշը կազմել է 23.6%՝ 2023-ի համեմատ նվազելով 0.45 կետով, բայց վերջին 7 տարում բարելավվել է 2.8 կետով:
Նախարարը հայտնել է նաև, որ 2024-ին կնքվել են կրկնակի հարկումը բացառող համաձայնագրեր Հոնկոնգի և Ճապոնիայի հետ, ինչպես նաև 850 մլն դոլարի վարկային և 40 մլն դոլարի դրամաշնորհային պայմանագրեր: Բացի այդ, ստացվել է 16 մլն դոլարի դրամաշնորհ՝ արտոնյալ ֆինանսավորման գլոբալ հիմնադրամից:
