ԱՄՆ պետքարտուղար Մարկո Ռուբիոն անդրադարձել է Ուկրաինայի շուրջ զարգացումներին, հիշեցրել է, որ Սաուդյան Արաբիայում ամերիկյան պատվիրակությունը հանդիպումներ է ունեցել ռուսական և ուկրաինական թիմերի հետ:
Նա հույս է հայտնել, որ այդ բանակցությունների արդյունքներով հնարավոր կլինի առաջընթաց գրանցել:
Ավելի վաղ ԱՄՆ նախագահը նախարարների կաբինետի հետ հանդիպմանը հայտարարել է, որ Վաշինգտոնը և Կիևը քննարկում են ուկրաինական ատոմային էլեկտրակայանների շահագործումն ամերիկյան ընկերություններին հանձնելու հնարավորությունը։ Դոնալդ Թրամփը նաև ակնկալում է, որ մոտ ապագայում ԱՄՆ-ը և Ուկրաինան կստորագրեն օգտակար հանածոների մասին համաձայնագիրը։
Նրա խոսքով՝ այժմ ռուս-ուկրաինական կարգավորման օրակարգում են նաև տարածքների հարցը, հնարավոր սահմանազատումը, էներգետիկ անվտանգությունը։ Սպիտակ տան ղեկավարը կրկնել է՝ հակամարտությունը պետք է դադարեցվի: Թրամփը բողոքել է, որ Միացյալ Նահանգներն արդեն չափից շատ է ծախսել Ուկրաինայում պատերազմի վրա:
