ԱԺ ՔՊ խմբակցության պատգամավոր Խաչատուր Սուքիասյանը հայտարարել է, որ գույքի կառավարման համակարգում 400 մլրդ-ից ավել գույք կա կուտակված, որոնց մեծ մասը ոչ վարձով է տրվում, ոչ՝ վաճառվում։ Միաժամանակ, ըստ նրա, մասնավոր սեկտորում միջինը 59 հազար գույքի առքուվաճառք է լինում։
«Ինչո՞ւ պետք է պետական ունեցվածքն այս կարգի մի կողմ դրված լինի, ու ոչ մի գեներացիա չապահովի երկրին»,- հարցրել է նա։
Վարչապետ Նիկոլ Փաշինյանը, արձագանքելով պատգամավորին, նշել է, որ նման խնդիր կա, և իրենց օրակարգային հարցերից է դրա լուծումը․
«Օրինակ, Հանրապետության հրապարակի վրա կա նման շենք, որ կառավարությունը փորձում է ինչ-որ ներդրումային տրամաբանության մեջ դնել, բայց բան չի ստացվում․ խոսքը նախկին կենտրոնական փոստի շենքի մասին է»,- ասել է նա՝ հավելելով, որ երբ քննարկում են, պարզվում է՝ շենքը մի շարք ստանդարտների չի համապատասխանում։
Վարչապետը նաև նշել է, որ 2024թ. պետ․ գույքի կառավարման տողով բյուջեի եկամուտներն էական աճել են՝ մոտ 20 մլրդ դրամի եկամուտ է եղել։
Փաշինյանը նաև նշել է, թե մասնավորեցված ահռելի գույք կա, որը ևս տնտեսական շրջանառության մեջ չէ։
