Խորհրդարանը քննարկում է Կոռուպցիայի կանխարգելման հանձնաժողովի անդամի ընտրության հարցը:
Մրցութային խորհրդի որոշման հիման վրա Կոռուպցիայի կանխարգելման հանձնաժողովի անդամի թափուր պաշտոնում առաջարկվել է Մարիաննա Բաղինյանի թեկնածությունը:
Թեկնածուին ներկայացնելու համար ձայնը տրվեց Մրցութային խորհրդի անդամ Արուսյակ Ջուլհակյանին:
Մարիաննա Բաղինյանը ծնվել է 1991 թվականի դեկտեմբերի 21-ին Երևանում, 1999-2009 թթ. սովորել և ավարտել է Երևանի Կարեն Դեմիրճյանի անվան թիվ 139 միջնակարգ դպրոցում:
2009-2013 թթ. սովորել և ավարտել է ԵՊՀ իրավագիտության ֆակուլտետում, ստացել իրավագիտության բակալավրի որակավորում:
2013-2016 թթ. սովորել և ավարտել է ԵՊՀ իրավագիտության ֆակուլտետի մագիստրատուրան:
2015-ի հունիսի 9-ին ընդունվել է աշխատանքի Դատական դեպարտամենտում՝ որպես կազմակերպաիրավական վարչության կրտսեր մասնագետ, այնուհետ նույն թվականի հոկտեմբերի 10-ին տեղափոխվել է Դատական դեպարտամենտի իրավական վերլուծության վարչության իրավական վերլուծության և դատական հանձնարարությունների բաժնի կրտսեր մասնագետի պաշտոնին:
2018-ին նշանակվել է Դատական դեպարտամենտի իրավական ակտերի մշակման և փորձաքննությունների վարչության բարձրագույն դատական խորհրդի նիստերի նախապատրաստման և որոշումների նախագծերի մշակման բաժնի առաջատար մասնագետի պաշտոնում:
Բաղինյանը 2021-ի սեպտեմբերի 13-ից մինչ օրս աշխատում է Կոռուպցիայի կանխարգելման հանձնաժողովում՝ որպես Բարեվարքության ուսումնասիրության վարչության պետ:
Ելույթի շրջանակում, ամփոփելով հանձնաժողովում շուրջ 4 տարվա աշխատանքային գործունեությունը և բարեվարքության ուսումնասիրության բնագավառում ձեռքբերումները, Մարիաննա Բաղինյանը փաստեց, որ Հայաստանը կարող է դառնալ տարածաշրջանային օրինակ կոռուպցիայի կանխարգելման գործիքակազմի շրջանակում բարեվարքության ուսումնասիրության գործում:
«Եթե արժանանամ ձեր վստահությանը և ընտրվեմ Կոռուպցիայի կանխարգելման հանձնաժողովի անդամի պաշտոնում, խոստանում եմ առաջնորդվել բացառապես հանրային շահով և անշեղորեն կերտել այն Հայաստանը, որտեղ բարեվարքությունը և կոռուպցիայի բացառումը հասարակության կենսակերպ կարող են դառնալ»,- հայտարարեց նա:
