ՀՀ զբոսաշրջության կոմիտեից հայտնում են, որ Հայաստանը ճանաչվել է առաջատար ուղղություն Economy Middle East պարբերականի «Eid Al-Fitr 2025»-ի 15 լավագույն տոնական ուղևորությունների ցանկում։
Այս տոնը՝ Կուրբան Բայրամը, հատուկ նշանակություն ունի բոլոր մուսուլմանների համար: Այն նշանավորում է Ռամադան ամսվա ավարտը՝ մեկամսյա ծոմապահության ժամանակաշրջանը, և Շավվալ ամսվա սկիզբը՝ իսլամական օրացույցի տասներորդ ամիսը: Ենթադրվում է, որ 2025 թվականին Eid Al-Fitr-ը կնշվի կամ մարտի 30-ին՝ կիրակի, կամ մարտի 31-ին՝ երկուշաբթի, կախված լուսնի տեսանելիությունից: Հանգստյան օրերի հետ համընկնելով՝ ԱՄԷ-ի բնակիչները կունենան չորս կամ հինգօրյա արձակուրդ՝ կախված Ռամադանի ավարտից, ինչը այս ժամանակահատվածը դարձնում է իդեալական սիրելիների հետ նոր վայրեր այցելելու համար:
Հոդվածում ներկայացված է 15 հայտնի ուղղություն, որոնք առաջարկվում են այցելել Կուրբան Բայրամի տոնակատարությունների ընթացքում: Ցանկում առաջին տեղում Հայաստանն է:
Հոդվածում նշվում է, որ Հայաստանը՝ հարուստ պատմությամբ և բնական գեղեցկությամբ օժտված երկիր, առաջարկում է բազմաթիվ տեսարժան վայրեր՝ դարձնելով այն Կուրբան Բայրամ 2025-ի համար այցելության լավագույն վայրերից մեկը: Երևանը՝ աշխույժ մայրաքաղաքը, հպարտանում է այնպիսի տեսարժան վայրերով, ինչպիսիք են Կասկադ համալիրը, Հանրապետության հրապարակը և Մատենադարանը՝ ձեռագրերի պահոցը:
ՅՈՒՆԵՍԿՕ-ի Համաշխարհային ժառանգության ցանկում ընդգրկված Գառնիի հեթանոսական տաճարն ու Գեղարդի վանքը արտացոլում են երկրի հարուստ մշակութային ժառանգությունը: Բնության սիրահարները կարող են այցելել Սևանա լիճ՝ աշխարհի ամենամեծ բարձրլեռնային քաղցրահամ լճերից մեկը, կամ արշավել Դիլիջանի գեղատեսիլ ազգային պարկում:
Պատմության սիրահարների համար Տաթևի միջնադարյան վանքը, որին կարելի է հասնել «Տաթևի թևեր» ճոպանուղով՝ աշխարհի ամենաերկար հետադարձելի ճոպանուղով, առաջարկում է անմոռանալի տեսարաններ:
