Այսօր ԼՂ-ի դեմ ադրբեջանական ագրեսիայի արդյունքում ծագած 2016թ. ապրիլյան քառօրյա պատերազմի 9-րդ տարելիցն է։ 2016 թվականի ապրիլի 1-ի լույս 2-ի գիշերը ադրբեջանական կողմը ԼՂ-ի նկատմամբ սկսեց լայնածավալ հարձակողական գործողություններ:
1994 թվականի հրադադարից հետո (Բիշքեկյան արձանագրություն) կողմերի միջև պարբերաբար տեղի էին ունենում սահմանային լարվածություններ, բայց 2016թ. ապրիլյան մարտերը դարձան ամենամեծ ռազմական գործողությունը 1994-ից ի վեր։
Ապրիլի 2-ի վաղ առավոտյան՝ ժամը 3:00-ի սահմաններում, Ադրբեջանի զինված ուժերը լայնածավալ հարձակում սկսեցին շփման գծի ողջ երկայնքով՝ կիրառելով հրետանի, տանկեր, հրթիռային համակարգեր և ավիացիա։
Հարձակումը հատկապես ինտենսիվ էր Թալիշի, Մարտակերտի, Մարտունու և Աղդամի ուղղություններով։
Հայկական կողմը կարճ ժամանակում հակահարված տվեց, հետ վերցրեց մի շարք կորցրած դիրքեր։
Ապրիլի 5-ին՝ Մոսկվայի միջնորդությամբ, կողմերը պայմանավորվեցին հրադադարի շուրջ, բայց մարտերը որոշ հատվածներում շարունակվեցին։
Պաշտոնական տվյալներով՝ հայկական կողմը ունեցավ 110 զոհ և 120 վիրավոր: Ըստ պաշտոնական տվյալների՝ ադրբեջանական կողմը տվել է մինչև 300 զոհ, այդ թվում՝ հատուկ նշանակության ուժերի զինվորներ։
