Իրանի արտգործնախարար Աբբաս Արաղչին X-ի իր էջում վերահաստատել է միջուկային գործարքի հարցում Իրանի դիրքորոշումը:
«ԱՄՆ նախագահին կարող է դուր չգալ 2015 թվականի միջուկային գործարքը։ Բայց այն պարունակում է Իրանի մեկ կարևոր պարտավորություն, որը մնում է ուժի մեջ, և որից շահել է նույնիսկ Միացյալ նահանգները՝ դուրս գալով գործարքից: Իրանը վերահաստատում է, որ ոչ մի դեպքում չի ձգտի, չի մշակի կամ ձեռք չի բերի միջուկային զենք»:
Արաղչին հիշեցրել է, որ Գործողությունների համատեղ համապարփակ ծրագրի ստորագրումից 10 տարի անց և նույնիսկ այն բանից հետո, երբ 7 տարի անց ԱՄՆ-ը միակողմանիորեն դուրս եկավ ծրագրից, չկա ապացույց, որ Իրանը խախտել է պարտավորությունը: Նույնիսկ ԱՄՆ ազգային հետախուզության տնօրեն Թուլսի Գաբարդը վերջերս դա հաստատել է:
«Դիվանագիտական ներգրավվածությունն աշխատել է նախկինում և դեռ կարող է աշխատել: Բայց բոլորի համար պետք է պարզ լինի, որ «ռազմական տարբերակ» հասկացություն գոյություն չունի, առավել ևս՝ «ռազմական լուծումը»: Մեր տարածաշրջանում աղետալի ձախողումները, որոնք ԱՄՆ նախկին վարչակազմերին արժեցել են ավելի քան 7 տրիլիոն դոլար, բավարար ապացույց են»,- ավարտել է գրառումը Իրանի արտգործնախարարը:
