Ֆրանսիայի նախագահ Էմանուել Մակրոնը ցանկանում է, որ ԵՄ գործարարները դադարեցնեն ներդրումներն Ամերիկայում՝ ի պատասխան ԱՄՆ նախագահ Դոնալդ Թրամփի մաքսատուրքերի։
«Կարևոր է, որ ապագա ներդրումները, հատկապես վերջին մի քանի շաբաթվա ընթացքում հայտարարված ներդրումները, որոշ ժամանակով դադարեցվեն, մինչև մենք հստակեցնենք իրավիճակը Միացյալ Նահանգների հետ»,- ասել Է Մակրոնը Ելիսեյան պալատում՝ տուժած ոլորտների և կառավարության ներկայացուցիչների հետ հանդիպման ժամանակ: Ֆրանսիայի նախագահը «հավաքական համերաշխության» կոչ է արել:
Այս ամսվա սկզբին Թրամփը հայտարարել էր, որ ֆրանսիական բեռնափոխադրող հսկա CMA CGM-ը մտադիր է 20 միլիարդ եվրո ներդնել ԱՄՆ-ում: Միևնույն ժամանակ, հունվարին շքեղ ապրանքների հսկա LVMH-ի ղեկավար Բեռնար Առնոն ասել էր, որ քննարկում է ԱՄՆ-ում ներդրումների ավելացման հնարավորությունը, և բարձր էր գնահատել Թրամփի տնտեսական քաղաքականությունը:
Չորեքշաբթի Թրամփի վարչակազմը ԵՄ-ի համար 20 տոկոս մաքսատուրքեր է սահմանել դեպի ԱՄՆ ամբողջ արտահանման համար, ինչը Մակրոնն անվանել է «դաժան և անհիմն որոշում»:
Նա հայտարարել է, որ Թրամփի մաքսատուրքերը հաստատում են Ֆրանսիայի իրավացիությունը՝ պնդելով, որ խստացվի առևտրային քաղաքականությունը, և ուժեղացվեն առևտրային պաշտպանության միջոցները:
Բացի պատասխան մաքսատուրքերից, ըստ Մակրոնի, Բրյուսելը պետք է դիտարկի ԵՄ-ի այսպես կոչված հակահարկադրանքի գործիքը ԱՄՆ-ի դեմ, նաև միջոցներ ձեռնարկի ամերիկյան խոշոր տեխնոլոգիաներին հարվածելու համար:«Ոչինչ բացառված չէ, բոլոր գործիքները սեղանին են»,- ասել է Մակրոնը։
