Այս ցնցումների ժամանակաշրջանում մեկ բան հստակ է՝ աշխարհի մեծ ցնցումների դեմ մենք պետք է միասին առաջ շարժվենք: Այդ մասին X-ի միկրոբլոգում գրել է Ֆրանսիայի նախագահ Էմանուել Մակրոնը։
«Այսօր ես զրուցեցի ՄԹ վարչապետ Քիր Սթարմերի հետ, ինչը հաջորդեց Եվրոպական հանձնաժողովի նախագահ Ուրսուլա ֆոն դեր Լայենի հետ երկու օր առաջ ունեցած իմ զրույցին։
Քանի որ համաշխարհային տնտեսությունը զգում է Միացյալ Նահանգների կողմից սահմանված մաքսատուրքերի ազդեցությունը, մենք վերահաստատեցինք մեր վճռականությունը սերտորեն համակարգելու մեր դիրքորոշումները ԱՄՆ նախագահ Դոնալդ Թրամփի հետ շարունակվող քննարկումներում։
Առևտրային պատերազմը ոչ ոքի համար ձեռնտու չէ։ Մենք պետք է լինենք միասնական և վճռական՝ պաշտպանելու մեր քաղաքացիներին և մեր բիզնեսները։
Ֆրանսիայի և Միացյալ Թագավորության պաշտպանության շտաբների պետերի Կիև կատարած այցից հետո մենք քննարկեցինք Ուկրաինայում տեղի ունեցած վերջին զարգացումները։
Ուկրաինային աջակցող կոալիցիայի հետ մենք շարունակում ենք մեր քննարկումները ուկրաինացի ժողովրդին երկարաժամկետ աջակցության շուրջ։
Վերջապես, ՄԹ վարչապետի հետ անդրադարձանք առանցքային երկկողմ և եվրոպական խնդիրներին։ Քանի որ անկայուն աշխարհում ամուր դաշինքները մնում են մեր լավագույն կողմնացույցը»,- նշված է գրառման մեջ:
