Միջուկային համաձայնագրին վերադառնալու վերաբերյալ ԱՄՆ-ի և Իրանի պաշտոնյաների միջև նախատեսված հանդիպումից մի քանի օր առաջ ԱՄՆ նախագահ Դոնալդ Թրամփը վերահաստատել է ռազմական գործողություններ սկսելու իր մտադրությունը, եթե Թեհրանը չընդունի իր վերջնագիրը։
Այս մասին Թրամփը հայտարարել է չորեքշաբթի՝ ապրիլի 9-ին, լրագրողների հետ զրույցում, որը հաղորդում է Associated Press-ը։
Թրամփը հայտարարել է, որ ցանկանում է, որ Իրանը բարգավաճի և «մեծ լինի», բայց թույլ չի տա, որ երկիրը միջուկային զենք ունենա։ Թեհրանը, իբր, սա հասկանում է, հայտարարել է ԱՄՆ նախագահը։ Նա նաև վերահաստատել է անհրաժեշտության դեպքում ռազմական ուժ կիրառելու իր խոստումը և ասել, որ Իսրայելը կմասնակցի հնարավոր հարձակմանը։
«Եթե դա անհրաժեշտ լինի անել ռազմական ճանապարհով, մենք դա կանենք ռազմական ճանապարհով։ Իսրայելը, ակնհայտորեն, շատ ակտիվ կլինի այս գործում։ Նրանք կլինեն այս ամենի առաջնորդները։ Բայց ոչ ոք մեզ չի առաջնորդում։ Մենք անում ենք այն, ինչ ուզում ենք», – վստահեցրել է Թրամփը։
Իրանը, ի պատասխան Թրամփի բազմաթիվ սպառնալիքներին, խոստացել է ԱՄՆ-ին «կոշտ պատասխանել» և կոչ է արել Վաշինգտոնին հետ կանգնել իրավիճակի սրումից։
