Շիրակի մարզպետ Դավիթ Առուշանյանը լրագրողների հետ զրույցում հայտարարել է, որ «Քաղաքացիական պայմանագիր» կուսակցությունը Գյումրիի ՏԻՄ ընտրություններում չի պարտվել։ Նրա խոսքով՝ ՔՊ-ի ստացած 17200 ձայնը միանշանակ հաղթանակի ցուցիչ է, քանի որ գյումրեցիներից նման աջակցություն ստանալը հեշտ գործ չէ. «Գյումրեցին երբ սիրում է, սիրում է, երբ չի սիրում, իր դիրքորոշումը հստակ արտահայտում է»,- ասել է նա։
Առուշանյանը նշել է, որ ՔՊ-ն ավագանիում ստացել է 14 մանդատ և ունի ամենամեծ խմբակցությունը, ինչը թույլ է տալիս որոշակի հետևություններ անել. «Ոմանք, 2-3 մանդատով, առանց կոալիցիա կազմելու, կարծում են, թե կարող են կառավարել Գյումրին»,- հավելել է նա։
Հարցին` ՔՊ-ն Գյումրիում առաջադրելու՞ է քաղաքապետի թեկնածու, մարզպետը պատասխանել է․ «Թեկնածուի վերաբերյալ պաշտոնական հայտարարություն կլինի մոտ օրերս՝ մանդատները ստանալուց հետո»։
Ինչ վերաբերում է իր հրաժարականի մասին լուրերին, Առուշանյանը հստակեցրել է․ «Ես, իհարկե, հրաժարական չեմ ներկայացնելու։ Վստահ կարող եմ ասել, որ լավ արդյունքներ գրանցելու դեպքում ոչ ոք աշխատանքից չի հեռացվելու»։
