ԱԺ առողջապահության հարցերի մշտական հանձնաժողովի նախագահ Արսեն Թորոսյանը գրել է.
«Այսօր ԱԺ Առողջապահության հարցերի մշտական հանձնաժողովի հերթական նիստի օրակարգում «Հայաստանի Հանրապետության ու Վերակառուցման և զարգացման միջազգային բանկի միջև «Համընդհանուր առողջապահական ծածկույթի ծրագրի իրականացում» վարկային համաձայնագիրը վավերացնելու մասին» օրենքի նախագիծն էր։ Համաձայնագիրը ստորագրվել է 2024 թվականի հուլիսի 25-ին:
ՀՀ առողջապահության նախարարի առաջին տեղակալ Լենա Նանուշյանը ներկայացրեց, որ համաձայնագրով նախատեսվում է բանկի կողմից Հայաստանին տրամադրել 102,000,000 եվրո վարկ՝ առողջության համապարփակ ծածկույթի ներդրման ծրագրի իրականացման համար:
Փոխնախարարի խոսքով ծրագրի նպատակն է բարելավել առաջնային առողջապահության որակը, բարձրացնել առողջապահության պետական ծախսերի արդյունավետությունը և նվազեցնել առողջապահական ծառայություններից օգտվելու ֆինանսական խոչընդոտները: Ծրագիրը գործելու է մինչեւ 2029 թվականի սեպտեմբերի 30-ը:
Նախագիծն արժանացել է հանձնաժողովի դրական եզրակացությանը»։
