Հայաստանի ԳԽ և Արցախի ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է.
Իլհամ Ալիեւը, ժողովրդա-խոսակցականով ասած՝ «վիզ է դրել, USAID-ի դեմ Թրամփին գործ է տալիս», Ռուսաստանի հետ դաշնակցային-ռազմավարական հարաբերություններ ունի, Ֆրանսիային էլ «լուրջ երկրի տեղ չի դնում»: Ուրեմն ինչու՞ Վաշինգտոնի եւ Մոսկվայի հետ չի քննարկում ԵԱՀԿ ՄԽ լուծարման հարցը, չի դիմում գործընկեր Իտալիային, Գերմանիային, «թանկագին եղբայր» Լուկաշենկոյին, որ միանան իր «արդարացի պահանջին»:
ԵԱՀԿ-ն 57 անդամ ունի, երբ 56-ը կհամաձայնեն, որ Մինսկի խումբը պետք է լուծարվի, Հայաստանը կորոշի՝ միանու՞մ է, թե վետո՞ է կիրառում: Պաշտոնական Երեւանի դիրքորոշումը, գուցե, դիվանագիտական մանեւր է: Բայց չպետք է թույլ տալ, որ Մինսկի խմբի հարցը քննարկվի այն կտրվածքով, որ Հայաստանի եւ Ադրբեջանի միջեւ «այլեւս հակամարտություն չկա»:
Նախ, ՄԽ-ն կազմավորվել է, որպեսզի որոշի ԼՂ կարգավիճակը, երկրորդ՝ ո՞վ է ասում, որ մի պայմանագիր ստորագրելով հայ-ադրբեջանական պատմական վեճը լուծվում է: Մինսկի խումբը ձեւավորվել է ԵԱՀԽ Հելսինկյան եզրափակիչ Ակտի իրավական հիմքով: Իսկ այն դեռեւս չի բեկանվել: Ի վերջո, Մինսկի խմբի լուծարման համար հարկ կլինի ընդունել նաեւ ՄԱԿ-ի Անվտանգության խորհրդի բանաձեւ: ՄԱԿ-ն ընդունելու է, որ Իլհամ Ալիեւն իրենից ուժե՞ղ է, ինքնալուծարվելու՞ է:
