Պետական եկամուտների կոմիտեի նախագահ Էդուարդ Հակոբյանն ապրիլի 12-ին Մեղրիի սահմանային անցակետում դիմավորել է վարչապետ Նիկոլ Փաշինյանին: Այս մասին հայտնում են ՊԵԿ-ից։
Վարչապետը և ՊԵԿ նախագահը շրջել են պետական սահմանի Ագարակի նոր կառուցվող անցակետի շինարարական հրապարակում, ծանոթացել են Մեղրիի սահմանային անցակետի վերակառուցման աշխատանքներին:
ՊԵԿ նախագահը ներկայացրել է անցակետի վերակառուցման ընդհանուր ծրագիրը, նախատեսվող աշխատանքները և շինարարության ներկա փուլի ընթացքը: ՊԵԿ նախագահը հայտնել է, որ ծրագրով նախատեսված աշխատանքի շուրջ 20 տոկոսն արդեն իրականացվել է:
Ծրագիրը, որի ընդհանուր արժեքը կազմում է ավելի քան 25 մլն եվրո, իրականացվում է ՀՀ Կառավարության և ԵՄ համաֆինանսավորմամբ: Շինարարական աշխատանքները մեկնարկել են 2023 թվականի սեպտեմբերին, ավարտը նախատեսվում է 2026 թվականին:
Արդյունքում կստեղծվի միջազգային չափորոշիչներին համապատասխան նոր մաքսային սահմանային անցակետ, որը հագեցած է լինելու ժամանակակից սարքավորումներով: Վերակառուցումից հետո անցակետի թողունակությունը մի քանի անգամ կավելանա։
