Ռուսաստանի արտաքին գործերի նախարար Սերգեյ Լավրովը հայտարարել է, որ Խորհրդային Միության փլուզումից հետո ՆԱՏՕ-ն կորցրել է իր արդիականությունը և «պետք է լուծարվի»։
Նրա խոսքով՝ արևելյան բլոկի անհետացումը վերացրել է այն սպառնալիքը, որին հակազդելու համար ստեղծվել էր Դաշինքը, և դրա հետ մեկտեղ փլուզվել է նախկին քաղաքական համակարգը։ «Այս առումով ՆԱՏՕ-ն պետք է լուծարվեր դեռևս այն ժամանակ, բայց այն ոչ միայն մնացել է, այլև իրեն հռչակել միակ կազմակերպությունը, որը կարող է տրամադրել անվտանգության երաշխիքներ»,- նշել է Լավրովը։
Ռուսաստանի ԱԳՆ ղեկավարը այս քաղաքականությունն անվանել է ձախողում՝ ընդգծելով, որ դաշինքի լուծարման հարցը մնում է բաց։ Լավրովի խոսքով՝ ՆԱՏՕ-ն և ԵԱՀԿ-ն չեն կարողացել ապահովել կայունություն և անվտանգություն։
«Նրանց գործողությունների արդյունքը լարվածության աճն է և Եվրոպայի ռազմականացումը՝ ներառյալ Գերմանիայի։ ՆԱՏՕ-ի ջանքերը կենտրոնացած են նոր հակամարտությանը նախապատրաստվելու վրա, իսկ Գերմանիան, Ֆրանսիան և Մեծ Բրիտանիան առաջատար դեր են խաղում այդ գործում», – հայտարարել է ՌԴ ԱԳ նախարարը։
Լավրովը մեղադրել է ՆԱՏՕ-ին նաև «ազնիվ խոսքով տրված խոստումը չկատարելու համար»: Նրա խոսքով՝ Դաշինքի ղեկավարները Գորբաչովին, իսկ հետո նաև Ելցինին հավաստիացրել են, որ դաշինքը չի ընդլայնվի դեպի արևելք:
