Կարծում ենք՝ արդեն իսկ տարեվերջին կկարողանանք անցնել Ակադեմիական քաղաքի իրականացման հաջորդ փուլին, որը բուն նախագծման և շինարարության փուլն է: Զուգահեռաբար ներդրումային ծրագրի մշակման աշխատանքներն են իրականացվում: Հեղինակավոր գործընկեր ենք ներգրավելու, որպեսզի ծրագրի ֆինանսավորման մոդելը ճիշտ ընտրվի: Այդ մասին Ազգային ժողովի՝ ապրիլի 15-ի նիստին ասաց ԿԳՄՍ նախարար, հարակից զեկուցող Ժաննա Անդրեասյանը:
«Ամենաառաջին փուլում, երբ խոսում էինք Ակադեմիական քաղաքի իրականացումից, ամենահաճախ հանդիպող արձագանքն այն էր, որ սա գիտաֆանտաստիկայի ոլորտից է, և երբեք չի կարող տեղի ունենալ: Հիմա նաև այս դահլիճում կարող եք տեսնել, որ ամենաշատ հնչող հարցն այևս այն չէ, թե այս ծրագիրը կիրականանա՞, թե՞ չէ, այլ այն, որ գրել ենք՝ 2030 թվին սա կլինի, և դա կլինի 2030-ի՞ն, թե՞ 2031 թվին:
Ուրախ եմ, որ Ակադեմիական քաղաքի նախապատրաստական աշխատանքները բերել են հանրային խոսույթի այն փոփոխությանը, որի պարագայում մենք արդեն բոլորս տեսնում ենք, որ դա միանգամայն իրատեսական և արդեն իսկ իրականացող ծրագիր է»,- ասաց նա:
