«Իմ կարծիքով՝ նոր սահմանադրության տեքստում չպետք է լինի հղում անկախության հռչակագրին». ԱԺ-ում լրագրողների հետ զրույցում ասել է վարչապետ Նիկոլ Փաշինյանը։
«Ես 2022 կամ 2023, նույնիսկ՝ 2024 թվականին, անկախության հռչակագրի օրվա իմ ուղերձում, ասել եմ, որ, ուսումնասիրելով հռչակագրի տեքստը, նորովի կարդալով, գտել եմ, որ այդ տեքստը նրա մասին է, որ Հայաստանի անկախ պետականություն չի կարող լինել․ անհնար է։ Եթե ես դա ասել եմ, հետևաբար, չեմ կարող ասել, որ նոր սահմանադրության տեքստում պետք է լինի հղում անկախության հռչակագրին։ Ընդհակառակն, իմ կարծիքով՝ նոր սահմանադրության մեջ հղում չպետք է լինի անկախության հռչակագրին, բայց որոշողը ժողովուրդն է, իհարկե՝ կողմ և դեմ փաստարկներ բերողը քաղաքական ուժերն են, քաղաքական առաջնորդները։ Դա իմ քաղաքական դիրքորոշումն է»- նշեց Փաշինյանը։
Նրա խոսքով՝ նոր սահմանադրության ընդունման հարցը օրակարգում է եղել հեղափոխությունից անմիջապես հետո, և դեռս 2020թ․ հունվարին ինքն անդրադարձել է այդ խնդրին․
«Հիմնական խնդիրը, որ տեսնում եմ, այն է, որ իրավակարգի և քաղաքացիների միջև օրգանական կապի խզում կա։ Եվ ես դա տեսնում եմ իմ ամենօրյա աշխատանքում։ Իրավակարգը, որ բխում է սահմանադրությունից, կտրված է ժողովրդից մի պարզ պատճառով. սահմանադրական բոլոր հանրաքվեները ժողովրդի անհրաժեշտ թվով ձայները չեն ստացել. այլ կերպ ասած՝ հանրաքվեների արդյունքները մանիպուլացվել և կեղծվել են»,- նշեց վարչապետը։
