ՌԴ ԱԳ նախարար Սերգեյ Լավրովի Իրանի պաշտոնակցի՝ Աբբաս Արաղչիի հետ հանդիպումից հետո հայտարարել է, որ Ռուսաստանը ողջունում է Իրանի և ԱՄՆ-ի՝ իրանական միջուկային ծրագրի վերաբերյալ օբյեկտիվ համաձայնությունների հասնելու ձգտումը։
Նրա խոսքով՝ Ռուսաստանը պատրաստ է աջակցել Վաշինգտոնի և Թեհրանի միջև միջուկային համաձայնությունների ձեռքբերմանը՝ այն պայմանով, որ այդ համաձայնությունները կլինեն փոխընդունելի և հաշվի կառնեն նաև Իրանի շահերը։
«Մենք պատրաստ ենք օգնել, միջնորդել, ստանձնել ցանկացած դեր, որը Իրանի տեսանկյունից կլինի օգտակար և ընդունելի կլինի Միացյալ Նահանգների համար», – նշել է Լավրովը։
«Ուզում եմ առանձնապես ընդգծել, որ Իրանը պատրաստ է համաձայնության հասնել միջուկային զենքի չտարածման մասին պայմանագրի շրջանակում։ Սա սկզբունքային հարց է, որը պարտավոր են հաշվի առնել այն կողմերը, որոնք փորձում են բանակցությունները ծանրաբեռնել միջուկային թեմային չվերաբերող հարցերով՝ ստեղծելով չափազանց վտանգավոր իրավիճակ», – հավելել է Լավրովը։
Նա նաև նշել է, որ բանակցությունները ոչ միջուկային թեմաներով «ծանրաբեռնելու» փորձերը համարում է վտանգավոր։
