Ռուսաստանը, նախագահ Վլադիմիր Պուտինի հայտարարած Զատկի հրադադարի ժամկետը լրանալուց հետո՝ ապրիլի 20-ի լույս 21-ի գիշերը, վերսկսել է Ուկրաինայի ուղղությամբ ՌԴ ԶՈՒ ավիահարվածները: Դնեպրոպետրովսկի մարզում ռուսական հարձակումների հետևանքով հրդեհ է բռնկվել սննդի գործարանում, վնասվել են ենթակառուցվածքները, իսկ Խարկովի մարզում անօդաչու թռչող սարքերը հարվածել են բարձրահարկ շենքին, հաղորդում են ուկրաինական լրատվամիջոցները:
Ըստ հաղորդագրությունների՝ ռուսական անօդաչու թռչող սարքերը հարվածել են նաև Խերսոնին, Նիկոլաևին և Չերկասիին: Մինչ այդ, Ուկրաինայի ռազմաօդային ուժերը հայտարարել էին երկրի հարավային շրջաններին հրթիռային սպառնալիքի մասին։
Ուկրաինայի զինված ուժերի գլխավոր հրամանատար Ալեքսանդր Սիրսկու զեկույցին հղում անելով՝ նախագահ Զելենսկին հայտարարել է, որ 30-ժամյա հրադադարի ընթացքում ռուսական զորքերը 67 հարձակում են իրականացրել տարբեր ուղղություններով, որոնցից ամենաշատը՝ Պոկրովսկում։ Զելենսկին նշել է, որ գրանցվել է 1355 հարձակում՝ ծանր սպառազինությամբ և ԱԹՍ-ներով:
Ուկրաինայի զինված ուժերի կողմից հրադադարի խախտման մասին հայտարարել է նաև ռուսական կողմը: Մոսկվայի հսկողության տակ գտնվող Խերսոնի նահանգապետն ուկրաինական բանակին մեղադրել է անօդաչու թռչող սարքերով հարձակումների և ականանետային հարվածների համար:
Վոլոդիմիր Զելենսկու առաջարկին՝ զինադադարի ժամկետը երկարաձգելու վերաբերյալ, Ռուսաստանի նախագահի մամուլի քարտուղար Դմիտրի Պեսկովը պատասխանել է, որ Կրեմլը մտադիր չէ երկարաձգել Զատկի հրադադարը, որը կավարտվի ապրիլի 20-ի կեսգիշերին:
