Եվրախորհրդարանի մի խումբ պատգամավորներ ուղերձներ են հղել՝ ոգեկոչելով Հայոց ցեղասպանության զոհերի հիշատակի 110-րդ տարելիցը։
ԵԽ պատգամավորներ՝ Նատալի Լուազոն, Ժորդան Բարդելան, Լորան Կաստիլյոն, Նիկոլա Բեյը, Ռայնհոլդ Լոպատկան, Նիլս Ուշակովսը, Մարիա Զախարիան գրառումներ են կատարել X-ի իրենց էջերում։
Նատալի Լուազոն նշել է, որ հայ ժողովրդի նկատմամբ իրականացված ցեղասպանությունը ոգեկոչելը զոհերին հարգանքի տուրք մատուցելու, նրանց նահատակությունը չմոռանալու և և հայ ժողովրդի՝ խաղաղության ու ապահովության մեջ ապրելու պարտավորությունն ապահովելու միջոց է:
ԵԽ մեկ այլ պատգամավոր Ժորդան Բարդելան իր գրառման մեջ նշել է, որ Ֆրանսիան և Եվրոպան պարտավոր են չհրաժարվել Հայաստանից և հայերից՝ ժողովրդավարական, քրիստոնեական և եվրոպական երկրից, եղբայրական ու բարեկամ ժողովրդից։
