ԱՄՆ պաշտպանության նախարարության առաջատար հետազոտությունների վարչությունը (DARPA) հայտնել է արդյունաբերական ընկերություններին, որ նպատակ ունի ստեղծել փոքր մերձլուսնային արբանյակ՝ ջրային սառույց որոնելու համար. հայտնում է SpaceNews պարբերականը։ Նախաձեռնությունը, որը կոչվում է LASSO (Lunar Assay via Small Satellite Orbiter) նպատակ ունի փորձարկել տիեզերանավերի գործառույթներն առանցքային երկու ուղղությամբ․
Շատ ցածր ուղեծրերում՝ մինչև 10 կմ բարձրության վրա, աշխատելու կարողություն։ Այդպիսի ուղեծրերում Լուսնի գրավիտացիոն դաշտի անհամաչափությունները դժվարացնում են կայուն ուղեծրի պահպանումը, և պարբերաբար ուղղումներ են պահանջվում։ Այս տեխնոլոգիաները կարևոր են միջլուսնային տարածությունում (Երկրի ու Լուսնի միջև) տիեզերանավերի առաջադեմ կառավարելիության և տիեզերական իրադրության իրազեկման (SSA) համար, ինչը հետաքրքրում է նաև ԱՄՆ տիեզերական ուժերին։
Լուսնի մակերևույթի քարտեզագրում՝ ջրի սառույցի պաշարների որոնմամբ։ Մինչև 4 տարվա ընթացքում նախատեսվում է քարտեզագրել ամբողջ մակերևույթը՝ հայտնաբերելով այն տարածքները, որտեղ մակերևույթի տակ առկա է առնվազն 5% ջրասառույց, ինչը կարող է արդարացնել դրա արդյունահանման ծախսերը։
DARPA-ն ակնկալում է, որ այս առաքելությունը կօգնի զարգացնել նոր տեխնոլոգիաներ՝ բարելավելով կառավարելիությունը և ապացուցված ջրային պաշարների բացահայտմամբ աջակցելով NASA-ի ու մասնավոր տիեզերական առաքելություններին։
DARPA-ն չի ներկայացրել կոնկրետ բյուջե, սակայն պահանջում է մոտավոր արժեքի գնահատական առաջարկի ամփոփման մեջ, և մանրամասն ֆինանսական ծրագիր՝ բանավոր փուլում։
