Վոլոդիմիր Զելենսկին մեկնաբանել է Դոնալդ Թրամփի հայտարարությունը, որ Ղրիմը մնալու է Ռուսաստանի կազմում:
«Մենք չենք կարող ինչ-որ բան տալ կամ չտալ։ Դա ուկրաինացիների սեփականությունն է: Մեզ համար Ղրիմը կմնա ժամանակավորապես օկուպացված տարածք»,- շեշտել է Ուկրաինայի նախագահը:
Զելենսկին նշել է, որ իր վարչակազմը չի կարող խախտել երկրի Սահմանադրությունը: Միաժամանակ նա ընդունել է, որ Ուկրաինան ներկայումս բավարար զենք չունի Ղրիմն ուժով վերադարձնելու համար։
«Տարածքային հարցերի շուրջ քննարկումները պետք է տեղի ունենան միայն լիակատար հրադադարից հետո։ Դրան հասնելու համար աշխարհն ունի պատժամիջոցներ, Ռուսաստանի վրա տնտեսական և դիվանագիտական ճնշման հնարավորություններ»,- հավելել է Զելենսկին:
Նրա խոսքով՝ Ուկրաինան պատրաստ է բանակցությունների՝ ցանկացած ձևաչափով և ցանկացած պահի: Նախագահը նաև տեղեկացրել է, որ առաջիկայում նախատեսված են կարևոր հանդիպումներ, որոնք կարող են նպաստել կրակի դադարեցմանը:
