Վրաստանի փոխարտգործնախարար Լաշա Դարսալիան հայտարարել է, որ Հայաստանը շատ կարևոր հարևան է Վրաստանի համար։
«Մեզ կապում է ռազմավարական գործընկերությունը, ուստի նման բարձր մակարդակի այցելությունները շատ կարևոր են։ Ինչպես գիտեք, տարածաշրջանում շատ կարևոր գործընթացներ են ընթանում, և այս ֆոնին նման այցելությունները, և մասնավորապես այս այցը, ավելի մեծ նշանակություն են ստանում»,- նշել է Դարսալիան:
Վրաստանի խորհրդարանի փոխխոսնակ Գիա Վոլսկին ևս կարևորել է Վրաստանի նախագահի այցերը Բաքու և Երևան։ Նրա խոսքով՝ Թբիլիսին ունի տարածաշրջանում անվտանգությունն ապահովելու ներուժ՝ որպես Հայաստանի և Ադրբեջանի հարաբերությունների կարգավորմամբ հետաքրքրված երկիր:
Անդրադառնալով Վրաստանի նախագահի Հայաստան այցին՝ Վոլսկին շեշտել է, որ ռազմավարական գործընկերոջ հետ հարաբերությունների զարգացումը կառավարության համար հատուկ հետաքրքրություն ներկայացնող ոլորտ է։
