Գյումրիի քաղաքապետի առաջին տեղակալ ընտրվեց Ավետիս Առաքելյանը. նախագիծը հավանության արժանացավ ավագանու այսօրվա նիստում։
Նա կոմունիստական կուսակցության ավագանու ցուցակի երկրորդ համարն է զբաղեցնում, Վարդան Ղուկասյանի փեսան է, Սամվել Բալասանյանի պաշտոնավարման տարիներին եղել է ավագանու «Հայկական վերածնունդ» խմբակցության անդամ։
Առաքելյանի թեկնածությանը կողմ քվեարկեց ավագանու 33 անդամից 17-ը, ՔՊ խմբակցությունը ձեռնպահ էր։
«Կապ չունի, որ իմ փեսան է, շատ պատասխանատու եմ ու պահանջելու եմ իրենից ավելի շատ, քան որևէ մեկից։ Շատ դժվար է ինձ հետ աշխատելը, շատ խիստ եմ լինելու յուրաքանչյուր հարցի վերաբերյալ»,- ասել է քաղաքապետ Վարդան Ղուկասյանը։
Երկրորդ տեղակալ ընտրվեց Գագիկ Մանուկյանը։ Նա Վարդան Ղուկասյանի պաշտոնավարման տարիներին մշտապես զբաղեցրել է Գյումրու փոխքաղաքապետի պաշտոնը։ Եղել է նաև ԱԺ պատգամավոր. Հայկոմկուսի Գյումրիի քաղկոմի քարտուղարն է։
