Հայաստանի ԳԽ և Արցախի ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է.
Հայրենական մեծ պատերազմի հայտնի զինվորական թղթակիցներից մեկը, հանրահայտ «Ողջերը եւ մեռածները» վեպի հեղինակ Կոնստանտին Սիմոնովը կյանքի վերջին տարիներին օրագրային խոստովանություն է արել, որ պատերազմի մասին ճշմարտությունը դեռեւս չի գրվել: Այդ պատերազմից ութսուն տարի է անցել, բայց պատմական բազմաթիվ իրադարձություններ մնում են չբացահայտված: Իսկ Հայաստանում ով չի ծուլանում՝ քառասունչորսօրյա պատերազմի մասին խոսում է:
Նախընտրական մթնոլորտ է, քարոզչությունը, կարելի է ասել, մեկնարկել է: Եւ այդ քննարկումների քաղաքական «մատրիցան» արդեն մշակված է՝ փոխադարձ մեղադրանքներ, կոմպրոմատներ եւ այլն: Պատերազմի գաղտնիքների «բացահայտումը» պետությանը, հանրությանը, Հայաստանի քաղաքացուն դրական ոչինչ չի տալու, առավել եւս՝ ԱԺ քննիչ հանձնաժոողովի Եզրակացության հրապարակայնացումը:
Նման փաստաթղթերի վրա դրվում է «հույժ գաղտնի» գրիֆ, դրանք տասնամյակներով գաղտնիացվում են: Ոչ թե պատերազմը դարձնում հեռուստաշոուի թեմա: Իսկ չորս-հինգ հազար զոհերի հարազատներին ի՞նչ եք ասելու, պարոնայք:
