Բաքվի վերաքննիչ դատարանը չի բավարարել յոթ տարվա ազատազրկման դատապարտված՝ ընդդիմադիր գործիչ Թոֆիգ Յաղուբլուի փաստաբանի միջնորդությունը: Յաղուբլին ազատազրկման է դատապարտվել խարդախության եւ դրամաշորթության մեղադրանքով, գործի հիմքում մեկ անձի ցուցմունքն է, որ արեւմտյան երկրներից մեկի մուտքի արտոնագիր ձեւակերպելու համար ինքը Յաղուբլիին կաշառք է տվել:
Դատարանի վճռի հրապարակման պահին Յաղուբլին անժամկետ հացադուլ է հայտարարել եւ արդեն երեսուներեք օր է՝ ոչ մի սնունդ չի ընդունում: Ըստ նրա դստեր, վերջին անգամ հորը տեսակցության են ուղեկցել էլեկտրասայլակի վրա, նա ինքնուրույն չի շարժվում, գտնվում է բժշկական հսկողության տակ: «Նա ամեն վայրկյան կարող է զրկվել կյանքից»,- ֆեյսբուքում գրել է Յաղուբլիի դուստրը:
Փաստաբանը միջնորդել էր, որ Յաղուբլիի նկատմամբ կիրառվի տնային կալանքը: Բաքվի վերաքննիչ դատարանը «լրացուցիչ հիմնավորումներ ձեռք բերելու» պատճառաբանությամբ վերջնական վճռի կայացումը երկու շաբաթով հետաձգել է: Դատարանի շենքի մոտ մայիսի 6-ին կայացած ինքնաբուխ հավաքի ընթացքում Ժողովրդական ճակատ կուսակցության առաջնորդ Ալի Քերմլին հայտարարել է, որ դա «մահապատժին հավասարազոր որոշում է», քանի որ Յաղուբլին երկու շաբաթ «հազիվ թե ապրի»:
Եվրոպայում ադրբեջանական վտարանդիության աղբյուրների տեղեկացվածությամբ՝ Յաղուբլին կմնա անազատության մեջ եւ, երեւի, կմահանա, քանի որ Իլհամ Ալիեւի աշխատակազմից նրան հորդորել են, որ ներողություն խնդրի դատարանում հնչեցրած՝ «ես Իլհամ Ալիեւի անձնական վրեժխնդրության զոհն եմ» հայտարարության համար եւ ներման խնդրագիր հղի նրան, բայց մերժում ստացել:
«Իհարկե, ես ուզում եմ ապրել,- փաստաբանի միջոցով ուղերձ է հղել Յաղուբլին,- բայց համոզված եմ, որ բանտային անարժանապատիվ կյանքով կվնասեմ Ադրբեջանին, իսկ մահս, գուցե, օգնի իմ ժողովրդին՝ Ադրբեջանում բռնապետության վրա սեւեռելով միջազգային հանրության ուշադրությունը»:
Թիվ 1 սյունակ, Վահրամ Աթանեսյան
