Իսրայելը պաշտպանել է Հնդկաստանի՝ ահաբեկչությունից պաշտպանվելու իրավունքը: «Իսրայելն աջակցում է Հնդկաստանի ինքնապաշտպանության իրավունքին։ Ահաբեկիչները պետք է իմանան, որ չեն կարող թաքնվել անմեղ մարդկանց դեմ իրենց նողկալի հանցագործություններից»,- X-ում գրել է Հնդկաստանում Իսրայելի դեսպան Ռեուվեն Ազարը։
Ապրիլի 22-ին Փահալգամում տեղի ունեցած ահաբեկչական հարձակումից հետո Հնդկաստանի զինված ուժերը երեքշաբթի ուշ երեկոյան սկսել են «Սինդուր» գործողությունը՝ հարվածներ հասցնելով Պակիստանում և Պակիստանի կողմից օկուպացված Քաշմիրում ահաբեկիչների 9 կարևոր օբյեկտների: Հնդկաստանի կառավարությունը հաստատել է, որ հաջողությամբ հարվածել են ահաբեկիչների բոլոր թիրախներին, և Պակիստանում քաղաքացիական, ռազմական կամ տնտեսական ենթակառուցվածքներ չեն տուժել։
Ըստ հնդկական ԶԼՄ-ների՝ վարչապետ Նարենդրա Մոդին բարձրաստիճան պաշտոնյաների հետ ամբողջ գիշեր ուշադիր հետևել է գործողության ընթացքին։ Աղբյուրները հաստատել են, որ վարչապետը մշտական կապ է պահել ազգային անվտանգության խորհրդականների և ռազմական հրամանատարների հետ՝ ապահովելով, որ գործողությունն ընթանա ըստ ծրագրի։
