Ես գոնե իմ անելիքը տեսնում եմ ՀՀ քաղաքացիների հետ շփումները հնարավորինս ուղիղ և չմիջնորդավորված ունենալու մեջ, և պետք է ասեմ, որ դա երբեք չի ընդհատվել: Այդ մասին ԱԺ-Կառավարություն հարցուպատասխանի ժամանակ ասաց ՀՀ վարչապետ Նիկոլ Փաշինյանը՝ պատասխանելով ԱԺ ՔՊ խմբակցության պատգամավոր Հռիփսիմե Գրիգորյանի հարցին:
«Եթե հետահայաց նայենք վերջին տարիներին, կտեսնենք, որ ամեն տարի կան պնդումներ, որ Կառավարությունը և քաղաքական մեծամասնությունը պատրաստվում են արտահերթ խորհրդարանական ընտրություններին, ինչի՞ հետ է կապված այդ պնդումը, որովհետև և՛ ես, և՛ մեր մյուս գործընկերները շատ ակտիվ մարզային հանդիպումներ ենք ունենում, ուղիղ շփումներ ենք ունենում քաղաքացիների հետ, իսկ ծանոթ ձեռագիրն այն է, որ եթե պաշտոնյան անմիջական, մոտ տարածությունից քաղաքացի տեսնում է, ապա դա ուղիղ ապացույցն է նրա, որ Կառավարությունը կամ քաղաքական մեծամասնությունը պատրաստվում է արտահերթ ընտրությունների»,- նշեց Փաշինյանը:
«Չենք պատրաստվում արտահերթ ընտրությունների: Մենք զբաղված ենք մեր ամենօրյա աշխատանքով, և քաղաքացիների հետ շփումը դրա շատ կարևոր մասն է»,- ընդգծեց նա:
Ինչ վերաբերում է հիբրիդային պատերազմներին, ապա Նիկոլ Փաշինյանն ասաց հետևյալը. «Ես այդ ամեն ինչին վերաբերվում եմ հետևյալ կերպ. մեր էներգիան սխալ ուղղությամբ և սխալ տեղ ուղղորդելու փորձ եմ ես դա դիտարկում: Ունենք մենք ասելիք, ասելիքը պետք է ասենք ժողովրդին, և ժողովուրդը ինչին պետք է ուշադիր լինի, ուշադիր կլինի: Հիմա հանրապետությունում 16 միլիոնի ծրագրով 2000 տուն է կառուցվում սահմանամերձ գյուղերում: Ինչ հիբրիդային պատերազմ լինի, չի կարող այդ տները վերացնել: Հարյուրավոր մանկապարտեզներ են կառուցվել, հարյուրավոր դպրոցներ են կառուցվում, ճանապարհներն էլ. հիբրիդները ճանապարհներից չեն օգտվում, դպրոցներից, մանկապարտեզներից չեն օգտվում»:
