Հռոմի կաթոլիկ եկեղեցու 133 կարդինալ 70 երկրից չորեքշաբթի՝ մայիսի 7-ին, սկսել է կոնկլավը՝ նոր պապի ընտրության գործընթացը: Առաջին օրը հիմնականում նվիրված է տարբեր կրոնական և նախապատրաստական արարողությունների:
Կարդինալները կհանդիպեն և կքվեարկեն գաղտնի և մեկուսի՝ Վատիկանի որմնանկարներով զարդարված Սիքստինյան մատուռում։ Գաղտնիությունը խախտող յուրաքանչյուր ոք ավտոմատ կերպով հեռացվում է եկեղեցուց։ Հավատացյալները պապի ընտրության մասին կտեղեկանան հատուկ տեղադրված ծխնելույզից դուրս եկող ծխի միջոցով: Սև ծուխը կնշանակի, որ պապը չի ընտրվել, իսկ սպիտակ ծուխը՝ որ ընտրվել է։
Հռոմի պապի ընտրությունը մայիսի 7-ին հնարավոր է, բայց քիչ հավանական։ Կոնկլավի առաջին օրը քվեարկության միայն մեկ փուլ է նախատեսված։ Նախորդ պապերին՝ Ֆրանցիսկոսին, Բենեդիկտոս XVI-ին և Հովհաննես Պողոս II-ին ընտրած կոնկլավները տևել են երկու-երեք օր։ Ամենաերկար կոնկլավը տևել է գրեթե երեք տարի։ Այն տեղի է ունեցել 13-րդ դարի երկրորդ կեսին։
Նոր պապի ընտրությունը կշարունակվի այնքան ժամանակ, մինչև թեկնածուներից մեկը ստանա կոնկլավի ձայների երկու երրորդից ավելին։ Առաջին օրը կարող է անցկացվել մեկ քվեարկություն։ Եթե առաջին քվեարկության ժամանակ ոչ ոք չի ընտրվում, կամ եթե կոնկլավի առաջին օրը քվեարկություն չի անցկացվում, ապա յուրաքանչյուր հաջորդ օրը պետք է անցկացվի քվեարկության չորս փուլ՝ երկուսը՝ առավոտյան և երկուսը՝ երեկոյան։ Եթե 33 փուլը բավարար չի լինում, ընտրում են եզրափակիչ փուլում ամենաշատ ձայներ ստացած երկու թեկնածուին։ Պայքարն արդեն շարունակվում է նրանց միջև, և նրանք չեն կարող մասնակցել քվեարկությանը։ Երբ վերջապես նոր հովվապետ է ընտրվում, կարդինալների կոլեգիայի նախագահը հարցնում է, թե արդյոք նա համաձայն է զբաղեցնել այդ պաշտոնը և ինչ անուն կընտրի իր համար։
Հռոմի կաթոլիկ եկեղեցու ղեկավարի պաշտոնի հիմնական հավակնորդներից մեկը համարվում է Սուրբ Աթոռի 70-ամյա պետքարտուղար, կարդինալ Պիետրո Պարոլինը, որը մինչև վերջերս Վատիկանում երկրորդ մարդն էր պապից հետո։
Ֆավորիտների թվում է ևս երկու իտալացի, որոնք, ինչպես Պարոլինը, աջակցում են հանգուցյալ Ֆրանցիսկոսի կուրսին: Նրանք են՝ Երուսաղեմի 60-ամյա լատինական պատրիարք կարդինալ Պիերբատիստա Պիցաբալան և Բոլոնիայի 69-ամյա արքեպիսկոպոս կարդինալ Մատեո Մարիա Ձուպին, որը գլխավորում է Իտալիայի եպիսկոպոսների համաժողովը։
