Ամենայն Հայոց կաթողիկոս Գարեգին Երկրորդը շնորհավորական ուղերձ է հղել Հռոմի պապ Լևոն 14-րդի ընտրման կապակցությամբ։
«Ձեր առաքելական ծառայության այս նոր հանգրվանում աղոթում ենք, որ Աստված ուժ և շնորհ պարգևի Ձերդ Սրբությանը՝ ճշմարտությամբ ու գթասրտությամբ առաջնորդելու Կաթոլիկ եկեղեցին և խաղաղության, արդարության ու հոգևոր նորոգության կարոտ ներկա աշխարհում մշտարթուն վկայելու մեր Տեր Հիսուսի Քրիստոսի Ավետարանը»,– ասված է ուղերձում։
Ամենայն հայոց կաթողիկոսն ընդգծել է, որ քույր եկեղեցիների միջև շարունակվում է քրիստոնեական սիրո ամուր կապը, որոնք վերջին տասնամյակներում զորացել են փոխադարձ հարգանքի, եղբայրական հանդիպումների և ընդհանուր վկայությունների շնորհիվ։
Գարեգին Երկրորդը Հռոմի պապին քաջառողջություն, երկար տարիների կյանք և հոգևոր անսպառ զորություն է մաղթել, որպեսզի կարողանա առաջնորդել Աստծո կողմից իրեն վստահված հավատացյալներին։
