Բաքվում տեղի է ունեցել ռուս և գերմանացի քաղաքական գործիչների ևս մեկ գաղտնի հանդիպում, որտեղ, ամենայն հավանականությամբ, քննարկվել է «Պետերբուրգյան երկխոսության» ապագան՝ ֆորում, որը ստեղծվել է Պուտինի և այն ժամանակ Գերմանիայի կանցլեր Գերհարդ Շրյոդերի նախաձեռնությամբ՝ 2001 թվականին, երկկողմ հարաբերություններ հաստատելու համար և պաշտոնապես դադարեցրել է իր գործունեությունը Ուկրաինայում պատերազմից հետո: Այս մասին հայտնել են գերմանական ARD հանրային հեռուստաալիքը և Die Zeit թերթը։
Ադրբեջանի մայրաքաղաք են ժամանել Գերմանիայի Սոցիալ-դեմոկրատական կուսակցության (SPD) արտաքին քաղաքականության փորձագետ Ռալֆ Շտեգները, Դաշնային կանցլերի նախկին ղեկավար Ռոնալդ Պոֆալան, Հյուսիսային Ռեյն-Վեստֆալիա երկրամասի կառավարության դաշնային և եվրոպական գործերի նախկին նախարար, քրիստոնյա դեմոկրատ Ստեֆան Հոլթհոֆ-Պֆերտները, ինչպես նաև «Պետերբուրգյան երկխոսության» նախկին գործադիր տնօրեն Մարտին Հոֆմանը։
Նրանցից ոչ ոք չի հերքել իր մասնակցությունը հանդիպմանը՝ ընդգծելով, որ այն կրել է մասնավոր բնույթ և որևէ պետական մարմնի կողմից չի պատվիրվել կամ ֆինանսավորվել։ Գերմանիայի արտաքին գործերի նախարարությունը նույնպես հայտարարել է, որ «հանդիպումները չեն անցկացվել կամ պլանավորվել դաշնային կառավարության անունից»։
Հանդիպմանը Ռուսաստանը ներկայացրել է երկրի նախկին վարչապետ, «Գազպրոմի» վերահսկիչ խորհրդի նախագահ Վիկտոր Զուբկովը։ Նրան ուղեկցել է Ռուսաստանի նախագահին առընթեր Մարդու իրավունքների խորհրդի ղեկավար Վալերի Ֆադեևը։ Սա առնվազն երրորդ նմանատիպ հանդիպումն է։ Ըստ աղբյուրի՝ Նախորդ անգամ նույն կազմով պատվիրակությունները երկու անգամ հանդիպել են Բաքվում՝ 2024 թվականին։
