ԱՄՆ նախագահ Դոնալդ Թրամփն անոնսավորել է, որ երկուշաբթի Վաշինգտոնի ժամանակով 10:00-ին հեռախոսազրույց կունենա Ռուսաստանի Դաշնության նախագահ Վլադիմիր Պուտինի հետ: Նույն օրը նա հեռավար բանակցություններ կվարի Ուկրաինայի նախագահ Զելենսկու, ինչպես նաեւ ՆԱՏՕ-ի անդամ մի քանի երկրի առաջնորդների հետ: «Խոսակցությունների թեմաները կլինեն «արյունալի բաղնիքի» դադարեցումը, որտեղ ամեն շաբաթ 5000 ռուսաստանցի եւ ուկրաինացի զինվորներ են զոհվում, եւ առեւտուրը»,- մանրամասնել է Միացյալ Նահանգների նախագահը:
«Հույս ունեմ, որ դա լավ օր կլինի, կհասնենք հրադադարի եւ այդ չափազանց դաժան պատերազմը, որ երբեք չպետք է սկսվեր, կավարտվի»,- եզրափակել է Դոնալդ Թրամփը:
Մայիսի 16-ին Ստամբուլում Թուրքիայի արտաքին գործերի նախարար Հաքան Ֆիդանի եւ Ազգային հետախուզության ծառայության տնօրեն Իբրահիմ Քալընի միջնորդությամբ տեղի է ունեցել Ռուսաստանի եւ Ուկրաինայի պատվիրակությունների հանդիպում, որ տեւել է ընդամենը մեկ ժամ քառասուն րոպե: Միակ առարկայական պայմանավորվածությունը, որ կողմերը հաստատել են, վերաբերում է «հազարը՝ հազարի դիմաց» սկզբունքով գերիների փոխանակմանը: Ընդ որում, փոխանակման վայրը ճշտված է՝ Կիեւի մարզի տարածք, բայց ժամկետը դեռեւս որոշված չէ:
Վլադիմիր Պուտինի հետ հեռախոսազրույցի մասին ԱՄՆ նախագահի անոնսից հետո Ռուսաստանի նախագահի մամուլի քարտուղար Պեսկովը ՏԱՍՍ-ին ասել է, որ Ռուսաստանի պատվիրակությունը ձեւակերպել է հրադադարի հաստատման նախապայմանները եւ ամենասեղմ ժամկետում դրանք կփոխանցի Ուկրաինային: Արեւմտյան մամուլի տեղեկացվածությամբ՝ թեեւ կողմերի պատվիրակությունները լքել են Ստամբուլը, բայց «փակ դռների ետեւում բանակցությունները շարունակվում են»: Որտե՞ղ եւ ի՞նչ ձեւաչափի քննարկումներ են ունենում Ռուսաստանը եւ Ուկրաինան՝ մանրամասնություններ հայտնի չեն:
Այդուհանդերձ, իտալական Il Fatto Quatidiano պարբերականին հղելով՝ inosmi.ru-ն գրում է, որ հրադադարի հաստատման Ռուսաստանի «նախապայմանները չափազանց կոշտ են»: Ցամաքում, օդում եւ ծովում կրակի վերջնական դադարեցման դիմաց Մոսկվան պահանջում է, որ Ուկրաինան ճանաչի Ղիրիմի, Դոնեցկի, Լուգանսկի, Խերսոնի եւ Զապորոժիեի մարզերի ռուսաստանապատկանությունը, հայտարարի ընդմիշտ ոչ բլոկային երկրի կարգավիճակ, որի տարածքում միջուկային զենք եւ ՆԱՏՕ-ի անդամ որեւէ պետության զինված ուժեր եւ սպառազինություններ չեն կարող տեղաբաշխվել:
Ստամբուլում ռուս-ամերիկյան բանակցությունների նախօրեին Ուկրաինայի հարցերով ԱՄՆ նախագահի հատուկ բանագնաց Քելոգը բացահայտել է, որ ԱՄՆ-ը հակամարտության կողմերին առաջարկում է զինադադար հաստատել զորքերի շփման ներկայիս գծով, կանգ առնել այնտեղ, որտեղ ներկայումս գտնվում են, իսկ որպես երաշխիք՝ Դնեպրի աջ ափին տեղաբաշխել եվրոպական խաղաղապահ ուժեր: Ըստ տեղեկությունների, Ուկրաինան սկզբունքորեն ընդունում է հրադադարի ամերիկյան առաջարկությունը, բայց պայմանով, որ զորքերը շփման գծից 15 կլիոմետր համամասնությամբ ետ քաշվեն, ձեւավորվի ապառազմականացված բուֆերային գոտի:
Եթե իտալական պարբերականի տեղեկությունը համապատասխանում կամ գոնե մոտ է իրականությանը, եւ Ռուսաստանի նախագահ Վլադիմիր Պուտինը ԱՄՆ պաշտոնակից Դոնալդ Թրամփի հետ հեռախոսային բանակցությունը վարելու է վերոհիշյալ նախապայմաններով, ապա Վաշինգտոնի համար դա դիվանագիտական փակուղի է, որից ելքի երկու տարբերակ կա. կամ Թրամփը պետք է ոչ միայն ընդունի Պուտինի «փոխզիջումները», այլեւ պարտավորվի, որ դրանք պարտադրելու է Վլադիմիր Զելենսկուն եւ ՆԱՏՕ-ի անդամ մի քանի երկրների առաջնորդներին, կամ ռուս-ամերիկյան բանակցությունները կխզվեն, եւ Միացյալ Նահանգների նախագահը հարկադրված կլինի կատարել խոստումը ու միանալ Ռուսաստանի դեմ Եվրամիության «պատժամիջոցային պատերազմին»:
Հարցին, թե ի՞նչ որոշում կընդունի, եթե Պուտինը չհամաձայնի հրադադարին, Դոնալդ Թրամփը Մերձավոր Արեւելքից տունդարձի ճանապարհին ուղեկցող լրագրողներին ասել է. «Ազնիվ խոսք, ես կգնամ այդ քայլին, դա Ռուսաստանի համար աղետ կլինի, քանի որ նրա տնտեսությունը մեծ դժվարությունների մեջ է՝ կախված նավթի գների անկման հետ»: Տեսականորեն, իհարկե, չի բացառվում, որ Պուտինը կհամաձայնի ներկայիս շփման գծով հրադադարի հաստատմանը, բայց դա արդեն հավանականության տեսության «ժանրից է»: Այնպես որ՝ «կապրենք մինչեւ երկուշաբթի»: Իսկ հետո առնվազն կռահելի կլինի, թե ուր է գնում «այս խելագար աշխարհը»:
Թիվ 1 սյունակ, Վահրամ Աթանեսյան
