Հայաստանի ինստիտուցիոնալ եւ արտախորհրդարանական ընդդիմության մանտրան, որ «Եվրոպայում մեզ ոչ ոք չի սպասում», վարչապետ Նիկոլ Փաշինյանի Տիրանա այցի ընթացքում քննություն չբռնեց: Փաշինյանը հանդիպեց Եվրոպայի խորհրդի եւ Եվրահնաձնաժողովի նախագահների հետ, որոնք աջակցություն հայտնեցին Եվրամիությանն անդամակցելու գործընթաց սկսելու Հայաստանի ձգտումներին: Նման դեպքերում ավելին չեն ասում:
Նախօրո՞ք էր այդպես ծրագրված, թե՞ Ռուսաստանը որոշել է արտաքին գործերի նախարարի Երեւան «կրիզիզ-այց» կազմակերպել՝ դժվար է կռահումներ անել: Իրողություն է, որ Սերգեյ Լավրովը Երեւան է ժամանում Տիրանայում վարչապետ Փաշինյանի բավական ընդգրկուն հանդիպումներից հետո: Ընդ որում, դա տեղի է ունենում նույն օրը, երբ Եվրամիության անդամ երկրների արտաքին գործերի նախարարները համաձայնեցնում են Ռուսաստանի դեմ պատժամիջոցների 17-րդ փաթեթը:
Այդ մասին սոցիալական X հարթակում գրառում է կատարել Եվրամիության արտաքին քաղաքականության եւ անվտանգության հարցերով գերագույն հանձնակատար Կայա Կալասը: Պատժամիջոցներ են սահմանվել ավելի քան 200 լցանավերի նկատմամբ: Արգելվում է դրանց մուտքը Եվրամիություն անդամ երկրների նավահանգիստներ, եվրոպական ընկերություններին արգելվում է որեւէ գործարք կնքել, որոնց իրականացմանը կարող են ներգրավվել այդ լցանավերը:
Այլ մանրամասնություններ Կալասը չի բացահայտել, բայց հավելել է, որ Եվրամիությունն սկսում է պատժամիջոցների հերթական փաթեթի «մշակման աշխատանքները»: Ուշագրավ է, որ Ռուսաստանի դեմ պատժամիջոցների հերթական փաթեթի ընդունումն ընթացակարգային խնդիրների չի բախվել՝ ի տարբերություն նախորդների, երբ Հունգարիան փորձում էր կասեցնել որոշումների կայացումը:
Ռուսաստանի դեմ պատժամիջոցների նոր փաթեթի ընդունումը տնտեսականից զատ, գուցե դրանից էլ առավել, քաղաքական նշանակություն ունի: Եվրամիության անդամ երկրների արտաքին գործերի նախարարների հանդիպումը հրավիրվել է ԱՄՆ եւ Ռուսաստանի նախագահների հեռախոսազրույցի հաջորդ օրը: Դա նշանակում է, որ Եվրամիությունը Թրամփ-Պուտին բանակցությունների արդյունքներից գոհ չէ:
Այս իրավիճակում, մանավանդ երբ չափազանց սառն են Եվրամիության եւ Վրաստանի հարաբերությունները, իսկ ԱՄՆ-ից դեռեւս չեն արձագանքել Վրաատանի վարչապետի բաց նամակին, իսկ Մեծ Բրիտանիայի կառավարությունը պատժամիջոցներ է կիրառել Ռուսաստանի «ստվերային նավատորմում» ընդգրկված ադրբեջանական «Զանգեզուր» լցանավի եւ նավթի վաճառքով զբաղվող մի ընկերության նկատմամբ, սառեցրել ադրբեջանցի հինգ գործարարի բանկային հաշիվները, Սերգեյ Լավրովի երեւանյան ուղեւորությունը կարելի է անվանել «ստուգայց»: Դիվանագիտական ի՞նչ «քեյս» ունի նա՝ դժվար է նույնիսկ կանխատեսում անել: Բայց երբ Լավրովը գալիս է Հայաստան, այն էլ գրեթե երկրօրյա այցով, ուրեմն լրաջագույն քննարկումների ծրագիր ունի:
Թիվ 1 սյունակ, Վահրամ Աթանեսյան
