Բուդապեշտում կայացած Թյուրքական պետությունների կազմակերպության գագաթնաժողովում Թուրքիայի նախագահ Ռեջեփ Թայիփ Էրդողանը հայտարարել է, որ ուշադիր հետևում են Կովկասում տեղի ունեցող իրադարձություններին․
«Մենք ուրախ ենք, որ Ադրբեջանը համաձայնության է եկել Հայաստանի հետ խաղաղության համաձայնագրի շուրջ։ Եթե երկու երկրների միջև հաջողվի մշտական խաղաղություն հաստատել, դա շատ հնարավորություններ կբացի մեր թյուրքական աշխարհի համար: Այս պահին վստահ եմ, որ հաղթանակած նախագահն՝ իմ եղբայր Ալիևը, պատմության մեջ կմնա որպես տարածաշրջանում խաղաղություն բերող առաջնորդ»,- ասել է Էրդողանը։
Էրդողանն այս շրջանակում խոսել է նաև Միջին միջանցքի մասին և այն ռազմավարական որակել թյուրքական աշխարհի համար․
«Մենք մեծապես կարևորում ենք կազմակերպության շրջանակներում համագործակցությունը Միջին միջանցքի հաջողության համար և ակնկալում անդամ երկրների աջակցությունը։ Նախկինում Կիպրոսում, Ղարաբաղում, Բոսնիայում և այսօր՝ Գազայում, տեղի ունեցած ողբերգությունները հիշեցնում են մեզ, որ մենք պետք է մտածենք մեր սահմաններից դուրս»,- ընդգծել է Թուրքիայի նախագահը։
