ԱԺ պաշտպանության եւ անվտանգության հարցերի մշտական հանձնաժողովի արտահերթ նիստը չկայացավ. զինծառայության կարգի փոփոխման աղմկահարույց նախագծի քննարկումը հետաձգվեց։
Հանձնաժողովի փոխնախագահ Արմեն Խաչատրյանն ասաց, որ պետք է մանրամասն քննարկել նախագիծը, որից հետո ընդգրկել օրակարգում:
Ընդդիմադիր պատգամավոր Գեղամ Մանուկյանը նշեց, որ օրենքի ընդունումը խնդրահարույց է․
«Բոլորն էլ նույն պատասխանատվությունն ունեն հայրենիքի հանդեպ՝ անկախ սոցիալական կարգավիճակից կամ ռասայից․ եթե խոսում եք կոռուպցիայի մասին, ապա պետք է արմատախիլ անեք այն», – ասաց Մանուկյանը:
Օրինագծի հեղինակ Հայկ Սարգսյանը պահանջեց, որ օրենքն ընդունվի մինչև հուլիսի 1-ը՝ ամառային զորակոչի սկիզբը։ Նրա խոսքով՝ հասարակությունը ոչ միայն դեմ չէ այս նախագծին, այլև սպասում է դրա ընդունմանը. այն կնպաստի հետախուզման մեջ գտնվողների վերադարձին և կկանխի արտագաղթը:
Հիշեցնենք, որ օրենքի նախագիծը բուռն քննարկումների է արժանացել ու որոշ իրավապաշտպանների կողմից խնդրահարույց համարվել։ Մարդու իրավունքների պաշտպան Անահիտ Մանասյանը ևս քննադատել է նախագիծը: Մանասյանն ընդգծել է, որ նախագծային կարգավորումները կարող են առաջացնել հասարակության լուրջ սոցիալական շերտավորում՝ հանգեցնելով խտրականության բացակայություն ենթադրող սկզբունքի խախտմանը:
