Տարածաշրջանային խաղաղության և բարեկեցության համար շատ կարևոր նախագիծը մեր նախագիծն է, որը շատ կարևոր անվանում ունի՝ «Խաղաղության խաչմերուկ»: Այդ մասին «Երևանյան երկխոսություն» երկրորդ միջազգային ֆորումի ժամանակ ասաց ՀՀ վարչապետ Նիկոլ Փաշինյանը։
«Այս նախագծի շրջանակում Հայաստանը առաջարկել է կոնկրետ լուծում տարածաշրջանային հաղորդակցության ուղիները երկկողմ, միջազգային և տարանցիկ շարժի համար բացելու նպատակով, և «Խաղաղության խաչմերուկ» նախագիծը մի քանի կարևոր սկզբունքների վրա է հիմնված. դրանք են տարածքային ամբողջականությունը, ինքնիշխանությունը, իրավազորությունը այն պետությունների, որոնց տարածքով անցնում են ճանապարհները, հաղորդակցության ուղիները, և փոխադարձությունը, որը նույնպես շատ կարևոր սկզբունք է այս նախագծի համար, և կարող եք տեսնել, որ սա շատ կարևոր նախագիծ է՝ հաղթահարելու համար մատակարարման համաշխարհային շղթաների ճգնաժամերը: Ադրբեջանի և Թուրքիայի հետ մեր ճանապարհները երբ բացվեն, դա նոր հնարավորություններ կբացի՝ կապակցելու համար Արևելքը և Արևմուտքը, Հյուսիսը և Հարավը»,- նշեց վարչապետը:
Նիկոլ Փաշինյանը նկատեց, որ հարցի հետ կապված Ադրբեջանի կողմից առկա է որոշակի վարանողականություն: «Մենք շատ ակտիվորեն քննարկում ենք հնարավոր լուծումները: Մենք առաջարկել ենք Ադրբեջանի Հանրապետության մտահոգությունները հաղթահարելու կոնկրետ ուղիներ. Հայաստանը պատրաստ է Ադրբեջանի արևմտյան մասերից Նախիջևան ՀՀ-ի տարածքով բեռնափոխադրումներ կազմակերպել: Այստեղ խնդիրը, օրակարգը նա է, որ կապակցվածություն լինի Նախիջևանի և Ադրբեջանի միջև, և Հայաստանը պատրաստ է լուծումներ տրամադրել: Որևէ վարանողականություն որևէ կասկած մենք չունենք: Հայկական լոկոմոտիվները կարող են Հայաստանի և Ադրբեջանի հսկողությունը անցնել. գնացքները Ադրբեջանից կարող են գալ, անցնել անձնագրային սահմանային վերահսկողություն և հասնել մինչև Նախիջևան, մնալ այնտեղ և հակառակ ուղղությամբ: Հայաստանը կոնկրետ առաջարկ ունի ապահովելու սա: Մենք ասում ենք՝ Ադրբեջանից Ադրբեջան Հայաստանի տարածքով և Հայաստանից Հայաստան՝ Ադրբեջանի տարածքով՝ հարգելով երկրների տարածքային ամբողջականությունը, ինքնիշխանությունը և իրավազորությունը: Այս առաջարկը պաշտոնական է, այն սեղանին է, և ցանկացած պահի, երբ Ադրբեջանը համաձայնի մենք պատրաստ կլինենք մուտք գործել այս գործընթացի իրագործման փուլ»,- ասաց նա:
Վարչապետն ընդգծեց, որ տևական և կայուն խաղաղությունը Հայաստանի և Ադրբեջանի միջև ոչ միայն հնարավոր է, այլև հասանելի: «Մենք վճռական ենք, հանձնառու ենք խաղաղության օրակարգին, մենք պատրաստ ենք շարունակել խորհրդակցություններն Ադրբեջանի հետ այն հարցում, թե ինչպես հասնել խաղաղության պայմանագրի ստորագրման կետին և այլ փաստաթղթերի ստորագրմանը, որոնք ամբողջովին և կտրականապես կփոխեն իրավիճակը և տարածաշրջանի ժողովուրդների ճակատագիրը, և մենք, իհարկե, հավատարիմ կլինենք այդ օրակարգին և ամեն ինչ կանենք, ամենը, ինչ մեզնից կախված է, իհարկե՝ հարգելով նշված սկզբունքները, և համոզմունքս այն է, որ, ի հեճուկս բոլոր փաստարկների, բոլոր սադրանքների և այլն, Հայաստանի և Ադրբեջանի միջև չի լինելու պատերազմ, լինելու է խաղաղություն, և դա շատ միանշանակ է ինձ համար»,- ասաց Նիկոլ Փաշինյանը:
